滙豐又搞新意思！為員工設計紅色Polo Shirt制服

夏日熱辣辣，我哋平日行街返工着住件T恤都滿頭大汗，更加難以想像一班銀行員工要着到西裝骨骨係乜感受。不過，最近好似有好消息，滙豐銀行喺內部電郵講，唔係着制服嘅分行同事，已經係今個月開始改着商務便服返工；仲有啲分行嘅員工，就會有件新嘅短袖制服。

新制服嘅先導計劃會係7、8月期間，喺幾間分行進行，件新制服就係一件紅噹噹嘅Polo Shirt，襯番滙豐自已嘅主色。試行期間，仲會收集客人同埋同事嘅意見，如果反應良好，仲話個目標係9月嘅時候全面推行。換咗件新嘅短袖衫，第時分行嘅冷氣都唔洗調校到咁凍，為環保出分力！

事實上，近年傳統大行都深受虛擬銀行衝擊，除咗全面改行電子化追趕，仲要學埋佢哋衣着。虛擬銀行嘅大班同員工，好多時都以商務便服示人，甚至就咁着件T恤外套，俾人一種輕鬆、「貼地」嘅形象；可能就係因為咁，啲大行先決定從「身」做起！

滙豐控股(00005)半日收升1.3%，報44.15港元。