美股升港股跌 A股升港股都係跌!到底衰邊瓣?

2021年07月22日 08:00
東網電視
更多新聞短片
次季以來,港股表現真係難睇。美股升,港股唔跟升;到最近A股氣氛好番啲,滬深股市兩融餘額更頻頻突破1萬億元人民幣大關,但卻無助港股表現,恒指都係跌,27,000點關危危乎矣。咁搞法,港股「獨弱」,股民不禁要問,到底搞邊科?
重磅的中資科技股插水,乃拖累港股表現的主因,基本上沒有異議。其次係,北水不但未有來撈貨,還在不斷減持,也是港股不振的原因。此外,香港處多事之秋,唔少港人移民、外資減磅,若然冇北水增持頂住,流動性較樓市高的股市浸浸落乏承接,也是無可避免的結果。
咁到底,港股幾時先至見底。筆者認為,至少見到呢3個現象,先至有轉勢迹象。
其一,恒生科技指數見底。作為參考,短期6,800至7,000點水平是一個重要支持位。
其次係,內地科創板新股上市重納正軌,即重新放行科企大型集資活動,為科技股氣氛扭轉弱勢帶來轉機。
其三,內地投資港股的基金集資活動再度活躍起來,意味有北水要南來。
魚缸冇咩好做,股民打牙骹,近期金融界其中一個國際熱話,乃呢年幾冇長途飛機可坐的美國富豪們,呢期興起坐太空船上太空玩,維珍集團和亞馬遜的創辦人都先後遨遊太空,並已平安返回地球。當中亞馬遜創辦人貝索斯返回地球發表感受時話,上太空不僅僅是純綷遊玩,而是要建造一條通往太空的道路,讓下一代和下下一代能建設出一個未來。呢句話可圈可點,難道留在地球沒有未來?
筆者在想,萬一中美世紀之爭演變成第三次世界大戰,有別於第一及第二次世界大戰用槍炮,而係互射核彈,咁搞法地球唔單只再冇樂土,就連渣都有得剩!唔通班美國富豪真係睇通睇透,做定最壞打算,諗住有咩依郁隨時飛上太空避難?
反正我地呢啲凡人,上太空如做夢,只有寄望中美兩強以和為貴,別輕言動武,避免全球攬炒!
東網產經專欄作者 帥哥