日本首富換位!滝崎武光身家近3000億元超越柳井正

2021年09月14日 11:37
東網電視
更多新聞短片
滝崎武光
據外媒億萬富豪榜顯示,日本感測器廠基恩斯(KEYENCE)創始人滝崎武光登上日本富豪榜榜首,超越服飾品牌UNIQLO母公司迅銷創始人柳井正。邊個話工字不出頭?
年屆76歲嘅滝崎武光,目前擁有382億美元(約2,979.6億港元)財富,位列世界首富第35位,不過因為佢為人低調,好少喺傳媒面前曝光,所以冇人識呢位富豪。
點解會突然富貴?主要係基恩斯股價近來持續攀升。自2020年至尋日收市,基恩斯股價上漲咗97%,外媒計算,公司市值約1,670億美元,成為日本僅次於豐田汽車嘅第二大公司。原因就當然係受惠於疫情後製造業大反彈,間間廠都大舉入貨啦。
另外,一早已經係東證一部「大藍籌」嘅基恩斯亦即將被納入日經225指數。因此,「日版講股佬」東京一吉資產管理公司主管秋野充成認為,滝崎武光嘅首富之位睇怕都仲有排坐。而日本富豪榜中,柳井正以355億美元膺第二位,軟銀嘅孫正義身家269億美元排第三。
至於滝崎武光本身就係二戰末期出世嘅,讀到工業高校之後就冇讀上去,反而對電機發明好有興趣,喺29歲就創立咗一間電機公司。到1986年先改名做「KEYENCE」,意思係「Key of Science」,可見滝崎佢幾咁熱愛科學。
另外,低調嘅滝崎仲有樣嘢好出名,就係「手鬆」。基恩斯係日本舊年最高薪嘅公司,每年4次發放特別獎金,將收益一部分分配畀員工,2,600名員工嘅平均年薪有1,751萬日圓(約123.71萬港元)。