內房債彈有幾大殺傷力?反壟斷旋風襲港 樓價會點走?

2021年09月23日 08:00
東網電視
更多新聞短片
內地監管大棒殺完科技股、教育股,濠賭股,內房股,終於殺到香港本地股,弄得港股周初破底而下,市場正關注全國最大的房企債務危機如何收科。不過,筆者認為,這家房企的債彈風險可控,不會演變成系統性風險,更不應與當日美國雷曼危機相提並論,皆因目前中國金融市場開放程度遠不及當年的美國。
不過,拆債彈係一回事,要推動「房住不炒」,係另一回事,影響亦更深遠。所謂「房住不炒」,即房子用來住,不許炒,更清楚地講,即住房不可作為資產投資炒賣。如是者,有三大後果,第一,住房冇得炒,少咗個吸納市場資金的投資資產;第二,內地樓價將會跌,皆因少咗投資需求;第三,內房企業的暴利時代告終,資金將由內房行業撤出至其他行業,金融將會是其中一個落腳地。
咁講法,中、港兩地金融咪有運行?理論上係,但實際上當然好多變數,尤其唔知監管風暴下個目標係邊個板塊,都係反彈減磅,撈貨就能忍則忍。
回說內房,內地樓價睇跌,在找到承接水平前,溢出效應將持續影響全球資產市場。畢竟這些年中國人是全球資產的最大買家,當中國人本土市場物業資產唔再升值,甚至要搬錢回國應付償債,拋售海外資產套現的壓力可以預見。
至於說,少咗有錢人南來買港樓的話,對香港樓價影響有多大?反正如今官方柯打香港發展商要幫手增加住房供應,起多啲公營房屋,相信發展商並沒有選擇的餘地,只有盡量迎合政府需要,市場供應增多,私宅投資需求又受壓抑,意味地產股的利潤空間將受擠壓,股價調整壓力亦隨之而來,在評估到具體影響前,都係行人止步。
內地要搞房住不炒,又限購、又限價,呢啲都同香港奉行的自由市場運作大不同。若然香港的私有產權概念在兩制下受保障,這些措施不會在香港出現。只是,到底香港樓市與內地主要城市應該有多少差距?一河之隔的深圳樓價若然作出較大的調整,香港新界北的樓市又會受多大影響?一句到尾,隨着香港經濟進一步融入大灣區,區內樓價長遠關連性必增加,即差距會逐步拉近。咁即係點?記得樓係要嚟住,唔係要嚟炒囉!
東網產經專欄作者 帥哥