共同富裕!美團出獎學金供「外賣仔」讀大學

2021年10月14日 14:55
東網電視
更多新聞短片
「外賣仔」(內地稱為騎手)可謂外賣平台的支柱之一,但唔少人都只當係過渡性質嘅工作。美團(03690)為應對「外賣仔」對職業發展的需求,旗下外賣仔生態建設方案「同舟計劃」有多項升級措施,包括為佢哋提供完成全額獎學金,以助員工開始讀大學,仲強調「外賣仔」無論係為依家份工作努力,定係為將來份新工儲力,公司都會提供支持,「讓他們在職時有保障,離開時有無限可能」咁話!
美團仲話,「外賣仔」係新就業形態下嘅一種職業,正不斷發展和完善,強調會為員工提供多元化機會同支持。有關完善措施,係今年同「外賣仔」傾咗110次,收集到嘅意見而制訂,仲話傾偈可以畀公司更了解「外賣仔」工作困難。
美團將與內地的國家開放大學合作,為想讀書嘅「外賣仔」,提供零經濟壓力且便捷的深造渠道。依家報咗名並通過選拔,共計有101名獲得全額獎學金,仲開始咗喺國家開放大學物流管理專業嘅學習啦!同時預告,嚟緊會繼續「加碼」,提供更多進修機會。
另外,公司亦推出集合多種培訓資源的網上學習平台,為「外賣仔」提供多種培訓內容。除咗配送技能,如果「外賣仔」對其他行業有興趣,都可以個平台學習創業開店、經營技巧和門店推廣等,一共110個唔同範圍嘅知識和技能課程。
至於打工仔最關心嘅晉升方面,美團就開放咗「站長培養計劃」和「騎手轉崗計劃」,通過「站長培養計劃」,預計每年將有近千名「外賣仔」可以升職做站長等管理崗位。而想轉部門嘅員工,「騎手轉崗計劃」就幫到手,可以轉做客戶服務、培訓師等。目前,在成都、蘇州、東莞、廈門等11個城市試點,有超過2,800名「外賣仔」報名參加計劃。