星展夥慈善團體向基層市民派逾3000個福袋

2022年01月26日 14:12
東網電視
更多新聞短片
第五波新冠肺炎疫情未止,苦了一班基層市民。星展銀行同慈善團體膳心連(Foodlink Foundation)、苗圃行動及香港聖公會安老院舍外展專業服務試驗計劃(九龍東)合作,搞咗個「星展Care more福袋展關懷​」行動,喺全港多區派發超過3,000個福袋,希望基層市民喺虎年唔再「苦」,仲要充滿祝福快樂添!
星展義工隊嘅同事,仲落手落腳參與包裝及派送福袋,親自送到安老院舍和社區服務中心的長者、低收入家庭及有需要人士,係愛啊!今鋪真係出錢又出力!
星展銀行(香港)執行董事兼集團推廣策略與傳訊部總監胡秀汶表示,疫情肆虐期間關懷弱勢社群,除咗希望同社區有需要人士分享農曆新年的喜樂,更希望為社會發放更多正能量。
福袋內有米、麵食、賀年食品、飲品等,雖然睇落無乜特別,但對基層市民嚟講,可能係最貼合佢哋嘅需要。絲絲都希望,大家可以趁住節日,多啲關心身邊嘅人、鄰舍,發揮互助互愛精神,人人齊齊開心過節,咁就最開心啦!