鮑威爾人工奀　不吃不喝一年仍買唔起港公屋單位

尋晚(24日)睇完香港金管局年報，眼見大家都係香港仔，總裁余偉文年薪接近1,000萬港元，都幾羨慕，早知細個讀多啲書啦！不過咁，原來大家都係央行總裁，原來堂堂美國聯儲局主席鮑威爾先係「勞動先鋒」，估唔到操控全球加息浪潮嘅男人，年薪只得20.35萬美元，真係只有付出，不求回報！

鮑威爾出身法律界，曾經做過執業律師，之後去華爾街做銀行家，係普林斯頓大學政治學士及喬治城大學法律博士。讀書就夠多啦，咁猛料，但得廿萬美金年薪?折合港元，用弱方兌換保證7.85:1美元，計到盡都係得159.74萬港紙。不吃不喝一年買二手公屋單位都有難度。如果想住太古城?唔好意思啊，鮑生，你要借9成按揭，不過未必過到壓力測試。

不過咁，又話分兩頭，鮑威爾人工雖然奀，但佢出鏡率高，叫做天下無人不識，由聯儲局主席個位退下來之後，應該大把大學搵佢講書，到時先可以真正名利雙收啦。