m18講場：譚仔三哥搞選美　「粉絲」有得投票

最近電視台嘅口罩選美比賽成為城中熱話，向來緊貼潮流嘅譚仔國際(02217)旗下譚仔三哥都唔執輸，搞咗個「三哥砂砂小姐」選美大賽，講明唔限年紀，齋講「美」。

嗱，唔係淨講美貌咁膚淺，仲要追求「美(米)」線手藝，能夠煮出一碗香濃甜辣兼備、層次豐厚、充滿南洋風味嘅砂砂湯肥牛鹿茸菇米線，咁就稱得上美味，先會客似雲來㗎嘛！

早前已喺香港分店進行面試招募，仲揀出5位候選佳麗，挑選3強就要「三粉」(即譚仔三哥粉絲)幫幫手，事關三粉及三哥意向各佔50%㗎！晉身3強嘅姐姐，到時會掀開佢哋嘅神秘面「砂」，展露深藏不露嘅一面，冠軍將會擔當「砂砂湯大使」，肩負宣傳「砂砂湯」重任，到時就靠哂各位「三粉」決定。想知心水嘅姐姐有無機會奪冠，唔洗估估下，去官方社交平台投票就得，3強投票會喺8月29日截止，將於9月1日公布名單。

留意返，今次「三哥砂砂小姐」選美大賽係由譚仔三哥新產品砂砂湯肥牛鹿茸菇米線冠名贊助，即係自己出錢贊助返自己，咁仲算唔算有贊助？