大快活50歲多搞作！出App畀食客預先落單　推外賣走塑捐飯盒

本港連鎖快餐店大快活(00052)今年50歲啦！公司將會於10至12月期間推出不同慶祝活動及推廣，誓要與眾同樂。其中一個重頭戲係推出手機應用程式「大快活App」，讓消費者可以預先落單及付款。公司亦非常「貼市」，加入可持續發展元素，搞咗個「走塑‧齊齊捐」活動，鼓勵外賣走餐具。

消費者只要係App落單時，揀「外賣走塑」，累積8次後，將會變成一盒飯，再經保良局向有需要社群派發。每當消費者捐出一盒飯，大快活加碼捐一盒飯予社區內的有需要人士，公司希望透過活動，鼓勵消費者在外賣時減少使用餐具，並為社區送上溫暖及關懷。

另外，為慶祝50周年，早前大快活全線分店已換上50周年制服，仲改用復刻版餐具。門市內亦展示出海報，全系列50張，除咗公司里程碑、懷舊物件及餐點等，仲有一半係關於員工故事，細述過去50年的點滴。