m18講場：鴻「兔」大展！醒兔坐鎮港交所開市

周四(26日)為大年初五，亦係癸卯兔年首個交易日，香港交易所(00388)按傳統舉行新春開市儀式，並為新冠疫情3年後首度重新開放，金融大會堂充滿新年氣氛，非常熱鬧。港交所主席史美倫笑言，今年大家終於不用再做「網友」，好高興可以見番大家，希望敲起嘅銅鑼聲，可以為香港經濟「加油、打氣」！

疫情3年舉行新春開市儀式，仲特登放咗啲賀年裝飾，包括揮春攤檔、風草；門口亦放置菊花、桃花、吉樹等年花，電子屏幕亦換上「恭賀新禧」作為祝福語。絲絲就覺得場內放嗰套鼓最好意頭，加埋鑼聲，「鑼鼓響一片，聲聲送舊年」，香港金融市場新一年一定好旺場，新股嘅敲鑼聲可以「響徹凌霄殿」！

要數最受歡迎嘅環節就一定係醒獅，人人都爭住摸下獅頭、獅尾，想加添好運。咪住先，隻獅子多咗兩隻耳仔嘅，原來係兔仔耳，為咗迎合今年兔年而設，期間限定！咁要唔要改名做「醒兔」呢何？唔理醒獅定醒兔，港股表現夠醒就得啦！絲絲也在此借會向各位觀眾拜年，祝大家新一年鴻「兔」大展！在股市如魚得水！