大和葉捷賢細說分析員血淚史

2023年01月31日 04:01
東網電視
更多新聞短片
「步步高陞」大家拜年嘅時候就聽得多,實踐起嚟真係人人一部血淚史!絲絲早排請到大和公共事業、再生能源及環保區域研究主管葉捷賢(Dennis)探討公用股同新能源股,順便了解吓分析員呢行近年有咩變化……聽完真係覺得「能者多勞」!
Dennis話,近年變化之一係產業發展同行情變化愈嚟愈快,「以前啲嘢好簡單,電力股咪睇吓中國嘅GDP(國內生產總值),預測需求係點,跟住睇吓個煤價,依家變咗要諗啲政策會唔會改?政府會唔會壓電價?今日畀嘅基本面分析,聽日會唔會另一回事呢?」
●跟50間公司 同內地競爭
又例如,以前上市公司畀個指引,咪番去改吓個Model(盈利預測模型)囉,依家係「你信唔信先」?好似舊年年頭好多人睇好陽光電源,點知出到嚟毛利率受壓、營銷開支上漲,又要減值,深入了解呢啲行業先知道唔同逆變器分銷渠道唔同,擴大市場份額要畀好多錢。
提到陽光電源,絲絲都留意到Dennis近排跟多咗好多A股公司,連切硅片嘅科創板公司都睇埋,搞到依家跟成差唔多50間公司,一方面係A股市場同內地高新技術不斷發展嘅縮影,另一方面就係佢要直接同內地嘅分析師大軍競爭,「人哋團隊好多人,我哋得幾個,出盡力都冇可能一個星期內出到報告,話晒唔可以太行貨,所以有時寫完出嚟都已經有啲過時。」
佢又慨嘆,「以前星級分析師可以好賺錢,但依家投行未必再好value一啲好好嘅分析師,覺得有人出報告咪得囉,齋靠間行個名啲人都會睇啦」。歐盟《金融工具市場法規II》(MiFID II)嘅生效亦都令基金想自己做番研究,搞到好多人被撬走。
●最緊要眾人皆醉我獨醒
不過,所謂「有危就有機」,Dennis認為,市場對分析員嘅需求依然充足,拼唔到速度,可以拼深度,憑知識同經驗篩選出有用嘅資料、預測到未來、眾人皆醉我獨醒先係最緊要,尤其是依家啲研究報告話就話汗牛充棟,真正有深入研究嘅其實唔多,又話「後生仔好多諗法,更適應新嘅變化同知識,反而係我哋啲老鬼要追、要學得夠快!」
●葉捷賢慨嘆,以前星級分析師可以好賺錢。