滙豐拯救SVB英國分部 祈耀年親揭來龍去脈...

2023年03月31日 00:01
東網電視
更多新聞短片
滙豐控股(00005)本月火速出手充當「白武士」收購硅谷銀行(SVB)英國分部,被視為一項「國家級任務」,到底背後來龍去脈係點呢?滙控行政總裁祈耀年尋日親自為一眾傳媒解惑,佢自己喺SVB UK遭英國監管機構接管翌日,亦即周六(3月11日)朝早致電英倫銀行嘅第二把交椅,提出以一英鎊收購,立刻得到對方「say yes」。
祈耀年解釋,監管機構當時最希望呢場風波可以喺周一(3月13日)7點開市前已穩定下來,當然,以滙控資產負債表嘅穩健程度,佢亦好有信心可短時間內穩定局勢。佢重申,有關收購決定冇受到監管機構鼓勵,亦冇人畀壓力佢,佢亦同董事局講應該採取行動。
佢話,達成呢單刁後冇感到後悔,事關公司從中獲取大批高質客戶,包括超過3,000家聚焦生物科技及科技行業嘅創新企業,佢又透露過去兩周獲大量以往存錢喺SVB嘅公司表示希望把帳戶轉至滙豐,可見交易為公司帶來巨大業務機會。
滙豐成功收購SVB UK之後,向後者注入約20億英鎊流動性,祈耀年稱,SVB UK並無問題,只係被美國母公司倒閉波及,向對方注入流動性只係希望釋除存戶憂慮,如今存款正回流SVB UK。
另外,由於集團並冇擁有SVB嘅品牌,所以有意重新打造品牌,團隊正在準備有關工作。祈耀年就話,滙豐嘅「六角形」標誌將會保留,以反映公司身份,但更加希望新品牌凸顯科技及創新行業嘅特徵。