m18講場:金管局30周年搞「生日Party」 余偉文真情流露

2023年03月31日 20:48
東網電視
更多新聞短片
金管局總裁余偉文
適逢今年係香港金融管理局成立30周年,金管局周五就喺辦公室搞咗一個小型「生日Party」慶祝!總裁余偉文喺最新一篇《匯思》提到,Party仲邀請咗好多過去30年陪伴、甚至帶領金管局成長的猛人!
其中包括歷位財政司司長、外匯基金委員會成員及眾多舊同事。余偉文仲話,呢個難得「跨代同堂」聚會,有啲好友更專程搭飛機回港出席。大家仲趁機會拍下多張合照;年資較淺嘅同事終於可以近距離見到久仰大名嘅前輩,好似見偶像咁興奮!
講番歷史,原來金管局喺1993年4月1日成立之時,連一個似樣嘅辦公室都未有,同事要分開三個地方工作,外匯基金管理局的同事在金鐘海富中心,而銀行業監理處同事則在金鐘政府合署辦公。仲引述前總裁陳德霖話,佢當年加入金管局時,「被安置」在會議室工作,遇到有人要用會議室,就要「走鬼」。直到1993年稍後時間,金管局先「合體」搬到花園道3號,再至2003年搬進國金二期寫字樓後,才有一個長期辦公室作為佢哋嘅「家」。
過去30年,對金管局一班人嚟講,最津津樂道竟然唔喺1998年「打大鱷」或者2008年「雷曼爆煲」呢啲金融大事,更加唔係為如何加強貨幣金融穩定和發展金融市場,多次嚴肅討論甚至唇槍舌劍;而係一啲更加細小嘅內部故事:例如1996年紐約辦公室開幕之日,同事如何趕在財政司司長來剪綵前數小時驚險地安排傢俬送齊;又或是在1999年除夕夜為千年蟲應急加班的同事,得到茶水部同事炮製的貼心消夜打氣。
余偉文話,30年來大家作戰無數,經歷過驚心動魄的「大仗」、有驚無險的「蝦碌」、無損友情的激辯,正正折射出金管局同事既是戰友亦是朋友的獨特文化!