遊日注意：日航推租衫服務直送酒店　每套衫價錢低至...

愛遊日本的香港人，「返鄉下」通常一抽二褦，日本航空諗出依個方法幫旅客減輕負擔！

話說佢哋同股神巴菲特嘅愛股住友商事推出租衫服務「Any Wear, Anywhere」(任何衣着，任何地方)，即日起至2024年8月31日嘅試行期間，搭日航到訪日本嘅旅客可以上去網站租衫褲套裝，送埋去你下榻嘅酒店。

每套4,000至7,000日圓(約216至378港元)，每位旅客最多可以揀8套租夠2個星期，款式可以Casual、Smart Casual或兩者兼有，埋單幾錢視乎你租幾多衫褲而定，最遲出發之前一個月落order。

其實，佢哋咁做目的係要減少浪費，衫褲嚟自商戶過剩嘅存貨，或者「古着」(即「二手」)，另一方面你行李輕咗，可以減低碳排放，一石二鳥。日航負責吸客，住友就搞個網上平台、採購、洗衫同埋速遞。

要注意嘅係，落單之前必須輸入航班資料，即係一定要坐日航先得，而日航老實講真係幾貴，絲絲求其check吓，9月下旬香港飛成田來回最平要6,337港元。日航方面就話，遲啲按計劃嘅市場反應，再考慮會唔會擴展至「寰宇一家」等同日航有代碼共享嘅航空公司。