【錢夫人巡舖】三大發鈔行齊加定存息 邊間最筍?

2023年09月16日 10:00
東網電視
更多新聞短片
 
所謂「薑愈老愈辣」,獅子行滙豐上星期嚟招「加按息又加定存息」,令其他行家焗住跟隊照做,亦反映「羊毛出自羊身上」嘅道理,皆因各大行加H按封頂息半厘,同加定存息嘅幅度相若,所以話呢,世界上係無免費午餐嘅!
當然,錢夫人職責係要同大家審視吓大型銀行最新嘅定存息率,以新資金為例,滙豐、渣打及中銀香港三大發鈔行都先後加息。
其中,滙豐調高尚玉或卓越理財客戶的3個月及6個月存息,前者加至4厘,後者加至4.2厘,兩者息口原先分別為3.5厘及3.6厘;滙豐One客戶則加至3.8厘及4厘,原先利率則為3.3厘及3.4厘。
中銀香港則將3個月及6個月存息加至4厘及4.2厘,起存額1萬港元,一般個人銀行客戶經網上或手機銀行可以開立。
渣打銀行加幅則較輕微,僅將3個月存期由3.4厘加至3.7厘,6個月存期維持3.8厘。另該行繼續推新一期「渣打馬拉松」活期存款優惠,4個月平均有約4厘利息。錢夫人亦對比咗今期利率跟上期有咩唔同,發現首輪息率較低,但之後兩個階段都上升。
第一階段:由開戶日至2023年10月31日,年利率2.5厘(上次為3厘)
第二階段:2023年11月1日至30日,年利率5厘(上次為4.5厘)
第三階段:2023年12月1日至2024年1月2日,年利率6厘(上次為5厘)
*註:想知最新利率宜向銀行職員查詢 / 有新資訊亦歡迎報料畀我哋