【錢夫人巡舖】虛銀定存息逐間捉　有間高達8厘

高息定存依家遍地開花，錢夫人留意到，今個星期一眾虛擬銀行又再積極加息搶錢吸納資金，其中WeLab Bank就「搞搞花臣」推出高息定期快閃優惠，1個月定存息高見8厘！

WeLab Bank話，由即日起至今個月16日下午3時前，用佢哋GoWealth智動投資顧問或自選基金服務，一筆過投資1萬元起(不包括每月供款)，並存入新資金開立1個月定期，會有8厘定息。

不過要留意，定期存款金額上限要同優惠期內的投資金額相同，即優惠期內一次性投資5萬元，定期存款金額上限最多係5萬。

另外，佢哋上調12個月以上長期港元定存息，當中2年期存息上調0.2個百分點至4.6厘，起存額由10元起跳，以放10萬元本金計，2年利息有9,200蚊。至於18個月及12個月存息，亦分別加至4.5厘及4.4厘。

至於另一虛擬銀行富融同樣加定存息至最高4.6厘，屬6個月存期；12個月存期則加至4.5厘，且不設最低起存額。