m18講場：雷軍轉行做車廠導賞員　米粉錯重點齋睇件衫？

小米集團(01810)首輛車「小米SU7」正式上市在即，公司創辦人雷軍日前就拍片，大玩「你問我答」，兼做導賞員，令小米汽車超級工廠內部首度曝光！

雷軍仲自爆，現時正為規模量產做準備，而車身車間嘅綜合自動比率達91%，而中大件零件運輸仲係100%自動化，可以「黑燈」生產（即係自動化產線，唔洗工作人員維持都運作到）。

唔講唔知，小米上周二(20日)公布業績，原來當日通過業績嘅董事會會議，就喺度舉行。一班董事唔止望下個廠，仲率先試揸小米SU7添。

新車成績係點，絲絲無水晶球預測。不過，可以肯定嘅係雷總魅力不減，事關唔少小米忠實擁躉「米粉」錯重點，問雷總件衫。向來錫米粉嘅佢，小米旗下小米商城火速將件衫上架，299人仔可get雷總同款，限量800件，秒殺。