m18講場：京東劉強東改行做直播帶貨？百億補貼農產

直播帶貨已成為零售重要渠道，就連京東集團(09618)創始人兼主席劉強東都玩埋一份，仲宣布旗下京東超市推出「百億農補項目」，喺3年內投入100億元人民幣資源，扶持、補貼農產，等消費者可以買到「平靚正」嘅農產品喎！

今年年初，京東零售就定下2024年「三大必贏之戰」，分別喺內容生態、開放生態，以及即時零售三方面大力發展。早一個星期，先宣布加碼內容生態建設，投入超過10億元人民幣現金和10億流量作為獎勵，吸引多啲原創作者同好嘅內容機構入駐。市場仲估緊京東除咗銀彈攻勢之外，仲有乜大招，原來搵咗「東哥」出馬。

不過，呢位「東哥」，佢係劉強東，但又唔係真正劉強東，由人工智能(AI)數碼人形式出現，聽聞呢位東哥仲用咗京東雲言犀自研嘅AI添，連人工都可以慳返。

東哥周一(15日)晚分別喺京東家電家居同京東超市2個採銷直播間做咗首場live，除咗sell貨，仲分享咗佢喺美食、讀書、生活等方面嘅經䌞同心得。至於直播成績係點，官方就無公布，但似乎幾受網民歡迎，事關有唔少購物購惠喎！