m18講場：打風停市成絕響　港交所姚嘉仁話好期待

「摩羯」襲港，港股全日停止交易。香港交易所(00388)副行政總裁姚嘉仁(Wilfred)趁機喺社交平台賣廣告，雖然颱風令港股被逼停市，但好快就可以同呢個情況講拜拜。因為自9月23日開始，將會落實打風開市，到時世界各地嘅投資者，無論晴天或落雨或打風，都可以喺港交所嘅交易時間內進行買賣。

佢仲透露，喺過去幾個月入面，一直同市場參與者、持份者緊密溝通，又進行市場演習，為「923」做好準備。同時多謝所有人嘅付出同支持，因為大家齊齊合作，支持香港作為世界級金融中心嘅韌性及競爭力。

事實上，小記聽聞，券商早前喺市場演習嘅過程非常順利，業界準備就緒咁話。

有一位私人家族辦公室創辦人喺Wilfred個貼文留言「At last! (終於)」，而大正資本創辦人及首席投資總監陳惠仁亦留言大讚係好政策添！睇到國際及本地投資者都咁支持，睇嚟港交所應該放心哂啦！