被米芝蓮遺漏的街頭小食
20151106
東網電視
更多新聞短片
本文介紹嘅滄海遺珠街頭小食，又是否中你心水？
不單止有黃翠如、洪永城，每個人心中仲有一間米芝蓮小食推介！《米芝蓮指南香港澳門2016》昨日新鮮出爐，來到第8屆，為了得到香港人的認受性，今年特別新增了街頭小食推介，共23個入圍名單，包括賣雞蛋仔、豆腐花、狗仔粉、車仔麵……的小店，然而結果一出，卻引來極大回響。有人話老外口味始終跟港人相差一大截，也有人話坊間有代表性的街頭小食多的是，好似大角咀英記油渣麵、南山村醬油魷魚、長洲杧果糯米糍、大埔阿婆豆腐花等；而食壇中人，如少年食神Michael、來自星星的陳俊偉、食好西的健吾亦各有所愛。以下的滄海遺珠又是否中你心水？
1.Michael（少年食神）推介
大角咀 佳佳車仔麵
有60年炮製車仔麵經驗，配料推介燜柚皮、電飯煲煮豬大腸和古法炸雲吞，最重要是食完唔會覺口渴。
2.陳俊偉（旅遊飲食寫作人）推介
大埔 阿婆豆花
價錢超值、老少咸宜，豆花綿滑而豆味濃，連店員都特別親切有禮，流露濃濃的街坊人情味。
3.健吾（多媒體創作人及大學講師）推介
大角咀 車品品碗仔翅
自己對碗仔翅的要求其實不太高，只要不是太膠、質地不要太杰又不要太稀、肉料夠、粉絲足就可以。但最重要的是湯唔好太多味精，今時今日根本冇一間食完之後唔口渴，如果大家發現有任何一間冇味精的，可以叫佢去試！不過健吾話車品品有時都會太重手，尚有改善空間。
（以下為編輯部推介）
4.大角咀 英記油渣麵
豬油渣麵係幾十年前香港的窮人恩物，材料好簡單，只係用肥豬膏炸出豬油後剩下的渣來煮麵，而有40年歷史的英記，以前只係車仔檔，入舖後水準依然。小店的豬油渣以炸香的半肥瘦腩肉做成，炸得乾身，而湯底則以豬骨、冬菇熬製；加埋自家炒製的菜脯、冬菜和辣到飛起的辣椒油，食到舔舔脷。
5.石硤尾 南山村醬汁魷魚
冇30年都有25年歷史，記者廿幾年前喺大坑東讀中學時已經常常幫襯，當年食晏即使食到幾飽，總會搵推車仔的阿伯買番幾條秘製醬油魷魚過吓口癮，而當年只係賣幾毫子一條。以前日頭都開檔的伯伯，據說近年因為年紀大，現在非定期於黃昏時分出動，下次咁啱經過南山村南豐樓平台，不妨去碰碰運氣啦！
6.銅鑼灣 丹麥餅店炸雞髀
去餅店買炸雞髀？無錯！炸雞髀係禮頓道丹麥餅店的名物，來幫襯的，很多都係為咗一隻賣17蚊、鮮炸即賣的炸髀而來。炸好後，店員會灑上少許淮鹽，唔理辣爆嘴一大啖咬落去，皮脆肉多汁，超級大滿足！唔好唔記得仲有孖腸熱狗同豬扒漢堡包！
7.長洲 平記糯米糍
如果講長洲平記，你未必知係咩舖頭，但若然話係糯米糍長龍店，肯定你會：哦！哦！哦！我知喎！賣杧果糯米糍賣到街知巷聞的平記，杧果糯米糍賣10蚊一粒，粒粒Size有半隻成年人嘅手掌咁大，由於皮薄餡多，咬開真係堅多杧果肉而俘虜大家，不少遊人回程時更會買番十個八個做手信。
8.西灣河 珍香園炸蘿蔔絲餅
提起炸油糍，大家未必知係乜東東，之不過說炸蘿蔔絲餅就相信不少人都知是甚麼美食了。有說炸蘿蔔絲餅是上世紀50、60年代著名的街頭小吃，如今已買少見少。由有逾半世紀的豆品老字號出品的炸蘿蔔絲餅，外形如小盒子般，咬開是條條蘿蔔絲，帶五香粉獨特香味，拌少許蝦米和西芹，味道鹹香惹味。
9.長洲 甘永泰魚蛋
好食嘅魚蛋買少見少，長洲嘅巨型魚蛋必是其一。由開業近40年的老字號自家天天製作，據說每日以鱔魚炮製魚蛋及魚片，而大大粒、足足比一般大3倍有多的白魚蛋，即炸即食，熱辣辣之餘，又爽口彈牙，絕對是長洲「Check Point」！
10.太子 美味食店臭豆腐
香港街邊美食多不勝數，要數遠近聞名的，臭豆腐必是三甲之一。很多人都說臭豆腐唔臭唔好食，那位於太子的美味食店供應的臭豆腐就一定超好食，事關其「臭」味令街坊告到上食環署，不過近年已經收斂晒！豆腐經天然發酵後產生的刺烈氣味並非人人受得了，接受得來隨時愛上，入口豆腐甜味較出且豆香滿滿，配小店特製的微酸豆瓣醬，超夾！
11.荃灣 民豐粉麵行韭菜餅
60年歷史老店，主要賣各式粉麵，亦兼賣雲吞水餃糯米糍，然而最受歡迎還是現煎現賣的韭菜餅，每日新鮮製作，韭菜和豬肉餡都是手切的，慢慢煎香至熟，香味吸引，食時外皮香脆，餡香有肉汁。