Nike Fire and Ice　兩極過聖誕

每逢聖誕，唔只有NBA群雄混戰，就連運動品牌亦都打得火熱，事關各式Signature Shoe都會換上聖誕新Look上陣，今年聖誕，同屬Nike Basketball旗下嘅LeBron 13、Kyrie 2、KD 8與Kobe X就合組「Fire and Ice」特別版應節。

今年嘅Nike Basketball聖誕特別版以「Fire and Ice」為設計主題，當中LeBron 13與Kyrie 2屬於冰極陣營，先以前者為例，冰藍色調嘅設計靈感，來自美國中西部嘅凜冽寒冬，點解要揀中西部？LeBron James嘅出生地，以及依家效力嘅Cleveland Cavaliers，正正就係位於中西部嘅俄亥俄州。陣陣寒意不只於此，因為獅子頭嘅透明鞋帶扣都選用透明藍，而鞋尾嘅「13」字樣亦以碎冰紋理托底。至於Kyrie 2就以雪人作為配色靈感，用咗淺藍與白色組合，加埋外底嘅透明設計，冰感程度不遜於LeBron 13，細心嘅話就會發現橫跨鞋面嘅搭帶表面壓印咗鋸齒形圖案，用以代表牙齒，似乎係向Kyrie 1致敬，事關後者嘅中底兩側亦都有鋸齒形圖案。

另一邊廂，屬於火焰陣營嘅KD8用咗鴛鴦色設計，鞋身外側係代表下雪嘅純白色，而內側以至鞋舌就係紅黑雙色，寒天之下，圍爐取暖時唔只有火焰嘅紅光，仲有黑沉沉嘅煤炭，除此之外，整個中底以至鞋尾嘅穩定器都有龜裂紋理，靈感嚟自煤炭燃燒時嘅爆裂效果。至於Kobe 10就更有「火氣」，事關由鞋面到鞋底都由紅黑雙色組成，絕無半點白色混雜其中，而鞋舌上嘅個人標誌，以至鞋側嘅Swoosh商標，選用既貴氣，又有節日氣氛嘅金色，不過講到最大意思嘅地方，莫過於鞋尾嘅五隻金色指環圖案，代表Kobe Bryant五奪NBA冠軍嘅光輝戰績；Kobe講到明，今季係佢最後一個NBA球季，無論你鍾唔鍾意聖誕節，但係作為Kobe死忠，見到呢個冠軍指環圖案，仲可以對Kobe 10「Fire and Ice」忍手嗎？

查詢︰2520 0771（灣仔莊士敦道Nike Basketball Store）