春日花攝 鬧市5大呃Like秘境
20160319
東網電視
更多新聞短片
香港市區有不少花攝秘境，大家準備好去呃Like未？
3、4月間春意正濃，又是花期開始的時候，不少影友都會趁復活節假期，帶齊「架生」到日、韓、台等地拍攝花見美態。其實想影花又何須走到外國或者老遠郊外，香港市區亦有不少花攝秘境，如元州邨花走廊、美孚饒宗頤文化館是近年爆紅的景點，大家準備好去呃Like未？
簕杜鵑 元州邨花走廊
大隱隱於市，花海其實都可隱藏於民居當中，長沙灣元州邨的花走廊是個好例子。這條長約30米的花走廊，每年3至4月間會有萬千朵紫紅簕杜鵑花盛放，就算近日只屬開花初期，都一樣可以影到似模似樣的呃Like相，而且花朵會漸次綻放，走在其中有被花海淹沒的感覺。值得一提，簕杜鵑紫紅色的「花瓣」只是其包葉，真正的花朵為中間細小部分，顏色以白、黃及黃綠為主。
前往方法：港鐵長沙灣站C2出口轉右步行約1分鐘。
宮粉羊蹄甲 美孚花節
宮粉羊蹄甲是香港常見的花種，如想拍攝一大片花海的話，位於美孚的饒宗頤文化館是好去處。由即日至4月底，饒宗頤文化館舉行花節，內裏的紅牆及白牆建築物，配襯紫紅色的花朵更有味道。宮粉羊蹄甲主要集中在館內中區及下區，邊參觀展覽邊賞花，賞心樂事。
前往方法：港鐵美孚站沿指示前往「饒宗頤文化館」，步行約8分鐘即達。
櫻花 鰂魚涌河津櫻
除咗日、韓、台有得睇櫻花，其實香港都可找到櫻花蹤影，品種則以山櫻花及河津櫻為主，會因應不同品種及地區而有不同開花時間。鰂魚涌公園種植了6株河津櫻，目前最壯大的一株已開花，吸引不少市民圍拍。小記視察後發覺其他櫻花樹已含苞待放，相信兩星期後就會開花，近期唔得閒的話，遲吓去影都冇問題。
前往方法：港鐵太古城站穿越太古城中心4期，經迴轉天橋再步行約2分鐘。
風鈴木 深水埗黃花隧道
賞花好去處，皆因公園中央行人徑兩旁種植了30多棵風鈴木，盛放時會形成一片黃色花海。除了喺黃花隧道影相呃Like，各位還可於兩旁大草地野餐，尤其當花期之末，滿地黃色花瓣時更壯觀。去年3月黃花開得極之燦爛，惟今年天氣比較反常，3月中還未見有花蕾，預計3月底至4月初來「打卡」就最啱！
前往方法：港鐵南昌站D1出口步行約5分鐘。
木棉 廣福紅棉
木棉花開時嫣紅嬌艷，可是由於樹高挺拔，要拍攝其美態唔係咁容易。位於大埔廣福邨的木棉樹種植於行人天橋旁，遊人可在高處欣賞和拍攝其盛開姿態，適逢現正踏入初開時期，相信3月底至4月初將是開花高峰期，影友不妨帶齊腳架和長鏡拍攝。
前往方法：港鐵大埔墟站步行往廣福邨，路程約8至10分鐘。
專家意見
影花達人兼創辦「旅‧攝」的Henry Lo表示：「拍攝花卉時，不少人抱怨鏡頭唔夠Wide，但我卻覺得廣角鏡用得太多。攝影並非將所有眼前的東西放晒入畫面，而是由攝影師將最動人的構圖記錄下來。當然如果花正盛開，夠多夠密又有好天氣，有天時地利人和，就是用Wide鏡的好時候，否則用長鏡會較適合。」