PS4 Remote Play　破解5問玩得招積

近期小記玩《The Division》玩到廢寢忘餐，唔單止喺屋企打通宵，甚至出街、返工都想繼續玩！日前PS4帶來的3.50版本升級就幫到小記，事關它追加了Remote Play@PC/Mac功能，更新後再於電腦安裝相關程式，即能隨時隨地遙距打機！整個安裝過程唔複雜，方法大可上網搵，小記在此不贅述，反而當中有5個問題非人人知曉，小記就幫大家拆解，自然玩得舒適，贏得招積！

第1：部PS4使唔使着住？

要，PS4要着住先遙距玩到，不能完全熄滅。若想慳電，用戶可將主機切換成「待命模式」，要玩時才經Remote Play重啟。方法是到「設定」->「省電設定」->「設定待命模式中的機能」，把「與網際網絡保持連線」及「設為可透過網路啟動PS4的電源」這兩個選項剔選，那以後經Remote Play接駁，PS4便會自動蘇醒。惟留意一點，雖然在正常情況下，PS4只需10秒便能重啟，但畫面往往未能傳送到電腦，電腦端要反覆連線後才有畫面，未盡完善。

第2問：畫質靚唔靚？

畫質要在連線前先設定，方法很簡單，進入PS4 Remote Play「設定」，即有720p、540p、360p三個解像度選擇，而幀率則有「標準」及「高」兩項提供。論畫質，當然無得同原來的1,080p相比，但小記把遊戲放至iMac 4K玩，其實720p畫質尚可接受，只是降到360p畫面才開始爛，字體亦變得模糊不清。除非網絡質素太差，否則不建議用太低解像度。

第3問：在街外用4G接駁得唔得？

官方建議用LAN接駁PS4，若用Wi-Fi的話，則電腦、PS4最好與Router愈接近愈好。至於在街上，小記試以Notebook接駁4G網絡測試，發覺連線時間由十多秒，大幅延長至一至兩分鐘；而且遊戲流暢度一般，以《The Division》為例子，在街漫步尚可接受，但一遇到大群敵人便有Lag機問題，似乎不太適合玩FPS類型遊戲。

第4問：雙打得唔得？

Remote Play支援DUALSHOCK手掣，玩時會有震動回饋，美中不足是要用USB接駁，打時不能離開電腦太遠。咁雙打又如何？試插兩組手掣到電腦，發現只有一組有反應，但若一組駁電腦，另一組駁回PS4，則兩組都能成功辨認，小記就成功跟同事對打《NBA 2K16》，過癮！手掣以外，Remote Play還對應電腦鍵盤，但實測見只支援方向鍵及Esc小量按鍵，用來跳轉Menu還可，打機未必可以。

第5問：係咪咩Game都玩到？

基本上，只要遊戲盒底印有「遙控遊玩」或「Remote Play」標誌，都支援PS4 Remote功能。實測見《The Division》、《NBA 2K16》、《人中之龍 極》都玩到，但據知PS Move及部分日版遊戲會因版權問題而變成黑畫面。