5個小動作　手機自保防入侵

今時今日只要有手機在手，基本上影相、上網、打機都做得到，但相對之下，內裏都有唔少你的私隱，存在唔少風險，萬一被人黑客Hack了就喊都無謂。為了保障自己避免招致損失，只要做足以下5個小動作，就可以減低被入侵的可能。

第1招：設定複雜密碼

唔少人覺得次次開機都要用密碼太麻煩，索性連密碼都唔Set，事實上我們唔單止要設定密碼，甚至要設定複雜的密碼。例如好多人都會將設置九宮格的圖形鎖（Pattern Lock）進行加密，不過十居其九都係用「N」形、「Z」形等4個點解鎖，不妨增加多幾個點、畫多幾筆強化複雜性。又有人會設置數字密碼，不過一般4位數密碼太易撞，建議增加至6位數或8位數，當然數字配合母字的密碼效果愈好。

第2招：定期清除瀏覽記錄

無論係用瀏覽器抑或App，手機內裏都存着大量訊息，而且部分帳號、密碼甚至會保持自動登入狀態，例如社交網站、網上購物等等，若果唔想對方輕易破解你的個人訊息，就要在一定時間把瀏覽紀錄清除。

第3招：別隨意連接Wi-Fi或藍芽

唔少人為了節省數據，有時到餐廳、商場都會連接那裏的Wi-Fi網絡，其實對方只要改一改Wi-Fi名稱，再利用軟件漏洞就可以引你上當，因此避免連接到不可靠的Wi-Fi網絡，同時應該要關自動連接Wi-Fi功能。另一方面，對方亦能夠透過藍芽控制手機，當中較常見的是Bluejacking、Bluesnarfing、Bluebugging惡意入侵技術，分別會發送匿名短信、竊取信息、向手機發出指令等，因此無必要就要關掉藍芽。

第4招：關閉聲控裝置

雖然Siri和Google Now係好好用，講一聲就能夠執行指令，之不過亦同時造成對方的便利，原來有人會利用手機耳筒為天線的漏洞，並以無線發射器入侵手機，從中利用語音執行指令，例如打電話、發送訊息、下載App等。而且部分手機只要一插入耳筒，就會自己啟動聲控功能，雖然對方執行的難度較高，但為了保障自己，都應盡量少用這類功能。

第五招：關上GPS免洩行蹤

GPS定位系統的的確方便，搵路、搭車、駕車都靠晒佢，而且玩社交網站仲會幫你記錄位置，諗深一層亦同時洩露了你的行蹤。雖知道對方要用Wi-Fi、藍芽或聲控入侵你的手機，就先要接近你的位置，對方點搵到你？就係靠GPS定位系統，所以非使用時就要關上，同埋可以幫你慳電。