小記親試「平民版」車仔麵　120蚊食3碗！

小記讀中學時，Lunch Time多數會跟同學仔車仔麵解決，十幾蚊食個3餸1麵，加埋腩汁就最無得頂！當然，我都明白「通漲猛於虎」呢個道理，但以前（我讀書果時囉，唔好問我幾多年前）學生哥都食得起嘅平民餐，而家竟然連私房菜名廚都叫貴！有無咁誇先？

嗱，「真相永遠只得一個」，就係要親身試過先知！今次小記就走訪咗3個「平民區」，分別係旺角、葵涌同埋大埔，跟住Jacky Yu咁叫個6餸1麵車仔麵，再加多杯嘢飲，睇吓同Jacky Yu嘅「高檔區」銅鑼灣相比，到底價錢差幾遠先？是咪連我哋呢啲平民都仲負擔得起？

大埔「萬利小食店」

網上評論不俗的「萬利小食店」，在大埔廣場主打學生哥及街坊生意，價錢當然大眾化，2餸1麵就HK$22，之後大部分餸都係HK$7，部分如牛腩、雞翼、牛柏葉就HK$9，仲有豆漿就HK$5。小記叫咗：魚蛋、釀豆卜、豬紅、雞全翼、炸魚皮、豬腸，配粗麵，合共HK$45。

先講腩汁，夠香濃，味道以車仔麵檔屬中上。餸方面就以魚蛋同豬紅最好味，前者係似細個時街邊魚蛋，夠?頭唔會鬆泡泡，後者就夠入味同夠實淨！而且雞翼係全翼，分量充足；魚皮分開上，唔會被泡軟。但要彈嘅係選擇唔算多，餸類款式較少，而且魚皮食落似擺了很久，太硬唔夠脆。另外，姐姐可能長時間對住個爐，唔，有啲燥，我明嘅。

值得一提，小記一行三人去食，包括一碗6餸同兩碗3餸，再加1杯豆漿2罐可樂，埋單啱啱好HK$120，相比起Jacky Yu，真係「一人價錢，三人同行」！

葵涌廣場「孖寶車仔麵」

今次揀選葵涌廣場地下的孖寶車仔麵，雖然規模不及隔籬的「輕鬆一下」，但以網上食評比較，呢間比較有質素保證。3餸1麵餐HK$39，後加餸每款7蚊。小記叫咗：咖喱魚蛋、魚皮餃、蟹子丸、雞中翼、鹵水蛋、豬紅，配油麵，合共HK$60，包一杯熱飲或冷熱豆漿，凍飲要加2蚊。

老實說，食物質素一般，印象兩年前好好食，而家麻麻，之前有名物叫「金枕頭」，類似炸魚蛋，堅好味！而家無得賣，我懷疑換咗老闆。

私下另加腸粉，超滑、索汁，好食過車仔麵好多！而且服務幾好，我會畀4粒星。

旺角「肥公車仔麵」

喺旺角鴉蘭街的「肥公車仔麵」，出名平得嚟質素都OK。大部分餸主要分為HK$5及HK$8，各款麵食HK$6，伊麵HK$10，最低消費HK$20；豆漿就大杯HK$7、細杯HK$5。小記叫咗：魚蛋、魚皮、魚皮餃、豬紅、雞翼、豬腸，共HK$42，價錢係三間之中最平！

小記食完覺得一個字：「好鹹」。湯底太濃太鹹，食完有口渴感。但餸就覺得OK，魚皮Keep到脆口、豬紅夠實淨、豬腸無怪味，而且雞翼好入味，而且夠腍唔係霉。

以性價比嚟講算係唔錯，但店內招呼好有「街邊檔風味」，最啱一個人啪完快閃！