新iPhone玩雙鏡頭　飛走耳機口？

話題一. 首用雙鏡頭 新iPhone飛走耳機口？

Apple第二財季營收13年來首次下滑，雖然未必關香港事，但就一定關iPhone事，光環不再下，大家都期待新iPhone有咩新搞作。早前日本雜誌《Mac Fan》就取得疑似手機設計圖，仲要係比iPhone 7更勁嘅iPhone Pro版本。從圖中可見，iPhone Pro機身尺寸為158.22 x 77.94 x 7.3mm，沒有明顯變薄，並與iPhone 6s Plus一樣採用5.5吋屏幕，連用色、外形也沒有太大分別。就咁睇似乎吸引力一般，但原來改變在骨子裹，例如首度採用雙鏡頭，拍攝時可改變焦距離，影景再Wide啲！另外一如傳聞將傳統3.5mm介面抽走，聽歌只能用Lightning耳機，從此廠商賣耳機又大賺一筆，實畀果迷鬧爆！其他有可能的新功能還包括無線充電、防水防塵等，究竟是真是假，就讓我們繼續看下去。

話題二. 放假必去！Google Play任夾任玩

提起Google Play，十之八九諗起手機遊戲，但有無發覺茫茫Game海中難搵到一隻心水作品？有見及此，Google由即日至5月4日期間假銅鑼灣利舞臺廣場Open Piazza，搞咗個「Google Play遊戲節之期間限定體驗區」，一次過Show Off十二款重點推介手機遊戲，例如《SimCity BuildIt》、《逐鹿三國》等。現場唔單止有人教玩，玩完仲可取得遊戲優惠及一次免費夾公仔機會，獎品超過3,000份，當中包括Nexus 5X、Nexus 9等大獎。小記就夾極都係小學雞鐵皮玩具，自問高手就去挑戰吓啦！

話題三. 玩厭Android！Meizu改推新系統

家陣手機系統唔係Android就iOS，雖然仲有Windows Phone，但相信無人想用啩！想突破啲試新嘢，不妨諗諗Ubuntu。呢個平台之前一直只在電腦出現，最近終於有廠商開發手機版本，例如新出呢部Meizu Pro 5 Ubuntu Edition就內置咗呢個系統，賣點係介面會因應不同需要切換成遊戲、音樂或生活等相關主題，操作更加人性化。手機規格都唔弱，包括Samsung Exynos 7420八核處理器、3GB RAM、21MP主鏡頭等等，不過香港暫時無得賣，想買就要上JD.com，盛惠369.99美元（約HK$2,870）。

話題四. G4 Plus喺邊度？喺印度！

上星期先同大家報道過Motorola新機G4 Plus有碟照流出，話口未完官方早兩日就發出邀請函，宣布將會在5月17日假印度新德里舉行發布會。為何千揀萬揀，揀印度唔揀彌敦道？原來Motorola在印度的知名度相當於Apple，市場上頗受歡迎，而且當地主打中階手機，所以在此發表G4 Plus也合情合理。而隨着發布日漸近，流出的資料也愈來愈多，據知新機將內置指紋識別器，並保留Moto一貫的換殻設計，叫人拭目以待。

話題五. 提升手感！iPhone專用手柄

雖然iPhone影相公認靚，不過機身太薄唔太好揸，手感依然差過傳統DC。外國有研發團隊係Steve Jobs死忠粉絲，為令iPhone拍攝更加就手，就研發出專用手柄Pictar。一經插入，就能為手機提供轉盤、快門及變焦掣，手柄位底部仲有腳架方便大家取景。Pictar目前放在Kickstarter集資，短短幾日已籌到10萬美元，最平70美元嘅Early Bird優惠仲一早賣晒，證明大家都受夠iPhone個影相設計了！