為食搜先Share：韓國馬卡龍雪糕　登陸旺角

最近，在韓國首爾、釜山的街頭，不少型男潮女都會邊行邊食馬卡龍雪糕，而櫻花荔枝味雪糕就是長期佔據榜首位置的大熱口味。要一嘗呢種韓國街頭美食，又唔一定要親身飛去當地，因為位於九龍旺角通菜街的Nun Desserts Cafe，不但緊貼韓國甜品熱潮，更不時將當地新奇又富玩味的甜品引入香港，令這款才剛剛在首爾及釜山街頭興起的馬卡龍雪糕，馬上就可以在香港吃到。

柯打前，要先自選心水的馬卡龍顏色，選擇包括有黃、紅、藍、紫，隻隻都咁靚，難免會有選擇困難症。至於雪糕口味一樣有4款，好似有甜酒、荔枝櫻花、杧果及草莓。最後仲可以在爆炸糖、Oreo碎及彩片中揀一種配料，有得食又有得玩。店長Caleb表示，雪糕全部是自家製的，其中最受歡迎的就是韓國現時最熱賣的口味，吃起來不但有清甜的荔枝果香，還會散發陣陣花香，雖然櫻花味不算突出，但勝在天然無添加。

此外，呢個馬卡龍足足有成8厘米直徑、超過6厘米的高度，比正常可以一啖放入口的法式馬卡龍大好多。店長Caleb即場示範進食馬卡龍雪糕的正確方法，就是將其整個用手拿起，張大嘴巴大啖咬落去，確保每一啖都食到蛋白脆餅、雪糕及配料，口感滿足又過癮。