為食妹妹長洲精華遊攻略 掃盡6大美食
20160513
東網電視
更多新聞短片
為食妹妹今次嚟到長洲食盡6大好西！
搭吓車，搭吓船，嚟到長洲旅行，嘩，長洲賓客人數好多呀！唔少人嚟長洲都鍾意拍吓拖，度吓假，又或者參加一年一度嘅太平清醮，但最緊要就係好似為食妹妹咁捐窿捐罅搵好西食呀！
第一站：甘永泰魚蛋
距離碼頭兩三分鐘路程就到甘永泰魚蛋啦，呢度啲魚蛋出晒名，唔落粉，唔落味精！我哋今次就無叫呃Like大魚蛋，反而叫咗細細粒白魚蛋，雖然白魚蛋外皮無咁脆口，但彈牙同魚味程度都相當高分！因為老闆堅持用好多條門鱔去做，粉少自然寧舍彈牙，5星星推介！
甘永泰魚蛋
長洲新興街106號地下
白魚蛋 HK$15
推介度：5粒星星
第二站：允升甜品
允升甜品除咗出名食杧果糯米糍，佢嗰店啲員工都出名夠晒霸氣，聞名網上。為食妹妹深入虎穴，幾經辛苦都買咗舊杧果糯米糍出嚟。杧果糯米糍皮簿餡靚，杧果鮮甜多汁，糯米皮煙靭度適中，不過Size就縮咗水，又好多粉，而且留意糯米糍係買幾多舊都好，都係無得堂食㗎，唔想畀姐姐鬧就要醒目啦！
允升甜品
長洲新興街3號
杧果糯米糍 HK$11
推介度：4粒星星
第三站：郭錦記餅店
嚟長洲買平安包，當然係指定動作！每年太平青醮嘅包山最大供應商郭錦記餅店 ，人流當然最多，更試過一日賣出過萬個！郭錦記出嘅平安包分別有三款口味：天津紅豆、湘南湘蓮、傳統白麻蓉。包身質感有啲硬，皮相當之厚，而內裏嘅餡卻少得可憐，不過都係食過意頭姐，如果仲係覺得好硬食唔落，下次可以返屋企蒸一蒸佢先食㗎！
郭錦記餅店
長洲北社街46號舖
平安包 HK$9
推介度：2粒星星
第四站：英皇茶餐廳
英皇茶餐廳就正正喺海傍，環境夠晒Relax，叫個下午茶，歎番個出名嘅凍橙檸，絕對係人生一大樂事呀！凍橙檸由新奇士舊橙榨成，除咗食到粒粒果肉，仲好鮮甜，配埋檸檬，夠晒清香，酸酸甜甜特別開胃！
英皇茶餐廳
長洲新興海旁路25號
凍橙檸 HK$20
推介度：4粒星星
第五站：長洲張記
喺碼頭附近嘅長洲張記，做咗魚蛋57年，好似老字號！為食妹妹就叫咗碗魚蛋粉試吓，魚蛋魚味都出，不過口感彈牙得嚟唔夠爽，而且無論魚蛋同魚片食落去都激鹹。不過河粉都幾好，唔會一夾就散，滑口但唔夠薄身，惟獨辣椒油係咁多樣嘢做得最出色，又香又辣，令魚蛋粉生色不少！
長洲張記
長洲海傍街83A地下
魚蛋河 HK$23
推介度：3粒星星
第六站：故鄉俱樂部
故鄉俱樂部係由日本吉野夫婦所經營，主打手卷同九州風紅豆餅。紅豆餅外皮唔夠細緻，咬落去好乾身，食唔到日本紅豆餅嗰種軟綿綿嘅感覺。不過紅豆蓉味道唔會太甜，餡料夠細軟，唔會話見到一粒粒紅豆出嚟。整體嚟講，都叫做合格啦！
故鄉俱樂部
長洲教堂路17號地下
紅豆餅 HK$6
推介度：4粒星星
提一提你，每年太平清醮都會有好多人專程入長洲，今年就預計有6萬人。為免人多擠逼，最好當然早一晚入去，不過而家未搵度假屋的話基本上都唔使諗。當日搭渡輪，早上10時開始會出現人潮，如果唔想逼就最好早啲起程！而當日早上6:30起每半小時就有一班船，而家好快啲度定行程喇！