寄艙數碼化　RIMOWA電子標籤

當咩都講求數碼化嘅年代，除咗電子機票外，Jet Setter又有無諗過連你托運嗰件行李都可以同數碼化扯上關係？著名德國行李箱品牌RIMOWA，近日就宣布即將推出附有電子標籤（Electronic Tag）的行李箱，其運作模式完全改變大家對「寄艙」要排長龍的傳統概念。實際應用情況係當你搭緊車去機場時，如果你用呢款附有電子標籤嘅RIMOWA行李箱，你就可以透過航空公司的App去完成托運行李程序，你除咗可以取得數碼登機證之外，同時亦會獲得航空公司發出的數碼行李資料，跟住你就可以透過智能電話以藍芽將行李箱資訊如：航班、出發地及目的地等傳到電子標籤上，到機場時只需再花上數秒就會完成托運程序，對於分秒必爭嘅都市人，時間就等如金錢，可以提早完成寄艙行李實在係功德無量，而德國漢莎航空就會成為首間支援相應技術的航空公司。

使用E-Ink技術的電子標籤無論外觀與傳統所使用的紙製行李牌完全一樣，當中亦有包括歐盟海關所要求的綠色條紋（所有從歐洲機場出發的航班所載行李箱必須附有此條紋），但電子化後就可避免紙製行李牌因濕度或撕裂而令行李箱重要資料遺失，而且E-Ink耗電量極低，只會在更改顯示內容時才會耗電，因此據稱所使用之電池最少可支援過百次內容更改，最難得係電子標籤結合到行李箱上都絕無影響其經典設計。附有電子標籤的RIMOWA行李箱將於今年6月左右便會正式推出，計我話如果港人最愛坐嘅國泰航空都可以提供相關支援服務，我相信肯定會全城瘋搶。想知電子標籤有幾方便，可以自己Click下面條Link慢慢研究！

查詢：2366 8085

網址：http://rimowa-electronictag.com/en-EN/start