TINY繼續本土 炮製巴士迷Dream House
20160615
東網電視
更多新聞短片
TINY以荔枝角巴士廠為設計藍本，最近推出咗1/76嘅本地巴士廠模型。
主打本土情懷，專門製作香港特色車仔嘅TINY，最近有破天荒嘅「大作」，就係巴士……廠了！據TINY創辦人Steve Ng表示，自己都係巴士迷，收藏咗好多巴士模型，亦都同好多同好有相同煩惱︰咁多巴士，點擺先好？因此有咗製作巴士廠模型嘅念頭。
呢座「TINY CITY BD5 Bus Depot」比例係1/76，正好係現時主流巴士模型嘅比例，樓高四層，布局熟口熟面，唔只有停車場，仲有辦工大樓，又有齊各種路標，加上比例準確，寧舍有代入感，原來參考咗茘枝角九巴巴士廠設計，而且取得有關方面授權。不過真正嘅巴士廠佔地好大，就算變成1/76都唔講得笑，阿Steve又點會唔明「土地不足」嘅問題？所以TINY巴士廠喺「取景」方面，只係局部地用咗原址嘅1/4，若然閣下屋企夠大，就可以「無限延伸」，阿Steve解說︰「我哋嘅巴士廠組裝簡單，唔使膠水、上色，而且玩家可以因應自己嘅家居空間，夠大嘅話，大可以用八套Boxset，將成間巴士廠完整砌番晒出嚟。」
除咗巴士廠，同步又有巴士維修工具上架，唔只有雪糕筒、千斤頂與各式樓梯，仲有清洗車身嘅籠架，後者設有四個毛刷，箇中用料大費周章，阿Steve回憶說︰「想成本低嘅話，可以用硬膠製作，不過失真，改用軟膠嘅話又上唔到色，我哋試過去深水埗，請教過30多位材料專家，最後終於搵到一種由台灣製造嘅毛絨布，可以做到形神俱似。」無論巴士廠或維修工具，由於產量唔多，有興趣嘅巴士迷可到TINY嘅官網，Click入「零售店」一欄，睇睇去邊間舖頭入貨最方便你，最好當然係事先打個電話落舖頭問問仲有冇貨啦！