是日本性：吾系貓 吾系狗 女友係乜系？
20160617
東網電視
更多新聞短片
中川翔子同喵星人性格相似。
日本人好鍾意將女友分成貓貓狗狗，甚至係其他動物，佢哋仲要分析得好有系統。想知自己女友或者自己係貓定係狗，又或者係企鵝定猩猩，咁就要睇下佢哋嘅分析喇！
貓系女友
性格特徵：傲驕又鍾意撒驕，卻又唔知點樣撒驕；會若無其事咁打擾你做嘢；自我中心兼有唔可以被人侵犯嘅私人空間；平時對男友好似漠不關心，查實好易呷醋；肚餓時會一反冷淡態度，黐住男友嗌：「肚仔餓……」
代表女優：中川翔子
身兼演員、聲優、歌手、主持人等嘅佢，出名晒名係愛貓之人，充分印證乜嘢叫做物以類聚。性格同貓極為相近，最愛鍾意貓嘅男人，絕對係貓系女友嘅代表人物。
犬系女友
性格特徵：擁有汪星人般嘅誠實；好似汪星人咁天真，會傻更更咁望住男友；鍾意畀男友摸……個頭；會突然擁住男友兼喺對方身上周圍聞；對男友有極強依賴性，相當黐身，只係有事起嚟卻會挺身而出。
代表女優：有村架純
唔好話屈佢，有村冇講過自己係犬系，只係佢身邊嘅人話佢性格好似，而日本網民更話佢嘅樣都似可愛嘅狗仔。話時話，佢演出嘅日劇《海女》又真係幾好睇。
兔系女友
性格特徵：日男大愛嘅兔系女友，撒嬌度爆燈，達到黎克特制唔撒嬌就會死級別；容易不安，時刻要人保護；鍾意喊，會邊喊邊瞓或者邊喊邊食嘢；超鍾意食嘢，可透過餵食提升好感度；經常想要愛愛，同時又係敏感體質（睇嚟呢個係佢人氣嘅原因），只係唔陪佢卻好易跟人走佬。
代表女優：長澤雅美
《在世界中心呼喚愛》嘅女主角長澤雅美，被日本媒體話佢係兔系女友嘅代表人物，皆因佢鍾意食嘢又容易不安，只係更多人覺得佢個樣似兔仔喎！
企鵝系女友
性格特徵：成日行行企企？唔係！佢哋係有自知之明，凡事都會冷靜判斷嘅頭腦型兼冷靜派人物；自制能力相當強，仲會反省自己嘅行動；思想相當現實，只係想法卻略為陰暗；平日相當理性，只係遇到心儀嘅男士時，卻會異常地大膽表白。（好似打機中嘅軍師型角色囉！）
代表女優：譜久村聖
人哋話譜久係企鵝系，所謂嘅人哋就係同屬早安少女組嘅隊友鞘師里保同埋鈴木香音嘞！作為組合中嘅隊長同副主音，梗係要有軍師般嘅冷靜同頭腦至得嘅。
猩猩系女友
性格特徵：講到猩猩系就諗起King Kong！不過呢度唔係講個樣，而係講性格。猩猩系女友戰鬥力極強，男友好易被Fight低；嬲嬲時一啲都唔豬，仲要大大力咁拍枱；討厭任何呵護嘅動作，尤其係摸佢個頭，小心被打斷手；極具個性，最討厭草食男，有欺凌佢哋嘅傾向。
代表女優：水原希子
日本網民推舉水原希子為猩猩系代表，皆因佢鬼妹性格夠獨立又有個性，敢作敢為又充滿生命力。睇佢喺《進擊的巨人》中飾演嘅米卡莎，戰鬥力又真係幾勁！
○○系女子診斷
睇完都仲未知自己或女友係乜嘢系，可以下載呢個「○○系女子診斷」App嚟診斷一下。