外遊免中伏 鴨記買SIM五招

20160627
東網電視
更多新聞短片
外遊免中伏 鴨記買SIM五招
暑期又嚟,相信唔少人已經Book晒機票、酒店準備出遊抖暑!依家去旅行食咩、住咩都唔重要,最緊要梗係要搞掂個上網,有咩慘得過冇得WhatsApp、Facebook打卡、Po相上IG呢?論最抵嘅外遊上網方案,買外遊SIM當然係首選,不過款色、價錢都多到你眼花繚亂 ,今次就教你5招,學識就唔會買錯SIM!
第1招:4G無限上網?
買SIM卡最重要就係留意時限及數據流量,用家要因應旅遊時間揀時限,多數分為5日、7日、10日等,相信唔難分辨。反而要睇清楚就係數據流量以及限速問題,一般包裝或者舖頭都會寫上「無限上網」,要留意大部分「無限」係有限4G數據使用量及無限3G數據使用量,意思就係當4G數據使用量超過時,流動數據又唔會直接暫停,而係將數據速度下調至3G,上網速度就會大幅下降。所以買卡時要知道4G流量有幾多,部分卡仲設有每日流量限制,一定要問清楚。
第2招:網絡制式有分別
有時換上外遊SIM之後,就會發現4G接收好唔穩定,網速又唔夠快,其實未必係外遊SIM卡有問題。因為每張外遊SIM都採用唔同電訊商,就以日本為例,最常見嘅電訊商就係docomo、softbank,其中docomo嘅4G網絡就採用Band 1 (2100MHz)、Band 19(800MHz)、Band 21(1500MHz)頻譜,如果你用緊部手機唔支援或者局部支援以上頻譜,就梗係收唔到或者收得唔好啦!部分手機嘅官網其實會有列明所支援網絡頻譜,查咗先買就冇有怕啦!
部分電訊商4G頻譜
日本docomo:
Band 1(2100MHz)、Band 19(800MHz)、Band 21(1500MHz)
韓國SK Telecom:
Band 1(2100MHz)、Band 3(1800MHz)、Band 5(800MHz)
台灣中華電訊:
Band 3(1800MHz)、Band 7(2600MHz)、Band 8(900MHz)
泰國DTAC:
Band 1(2100MHz)、Band 3(1800MHz)
澳洲Telstra:
Band 3(1800MHz)、Band 7(2600MHz)、Band 28(700MHz)
美國AT&T:
Band 2(1900MHz)、Band 4(1700MHz)、Band 17(700MHz)
英國Vodafone:
Band 1(2100MHz)、Band 3(1800MHz)、Band 7(2600MHz)、Band 20(800MHz)
第3招:網絡共享
一班人一齊去旅行,租Wi-Fi蛋Share用已經夠抵,如果買SIM再玩網絡共享咪抵上加抵?理論歸理論,現實係好多SIM卡會將網絡共享(Tethering)功能封鎖,所以未必用到!就算用到的話,記住網絡共享功能非常消耗數據流量,隨時未開始玩已經進入「限速」階段,咁就無謂啦!
第4招:APN設定
接入點名稱(APN、Access Point Name)係每張SIM卡啟動流動數據必需嘅設定程序,一般SIM卡說明書就會寫明設定步驟,好似Android機就只要根據說明進行設定、流動網絡、接入點名稱,再輸入名稱、接入點,用戶名稱、密碼等項目就搞掂。不過iPhone入面設定步驟或有所不同,例如著名遊日SIM b-mobile,就要下載APN設定檔至手機,換言之,過程需要連接流動數據或者Wi-Fi,如果到埗諗住即刻用的話,建議在香港預先或者連接機場Wi-Fi下載並完成設定程序,唔係嘅話有可能上唔到網用地圖搵路、搵酒店。
第5招:SIM卡Size
買SIM卡時仲要留意SIM卡Size,一般分為mini、micro、nano三款Size,部分卡就會好貼心將SIM卡預先分割成不同尺寸,用家只要輕輕一屈就可以變成所需尺寸,但有時SIM卡會提供指定尺寸,如果唔啱你手上機款嘅話就麻煩喇!最好方法就係事先了解機款所採用SIM卡尺寸,再同店員講清楚,未決定所用機款又或者唔知該機款用咩尺寸SIM卡的話,保險方法就係揀尺寸最細嘅nanoSIM,因為用家可以靠卡套將nano變回micro、mini。