冷氣文藝市集　感受夏日小清新

嘩，咁熱行市集，會出事㗎喎！唔怕，嚟K-11嘅Fashion Design Mart啦！呢度除咗有冷氣歎，仲有41位本地設計單位嘅作品睇，啱心水買番去長相廝守都仲得！

Studio Sorry今次的「把能」波鞋都喺到！設計師話靈感來自中國New Balance被大陸控告侵權嘅事件，於是就憤然將舊波鞋嘅N字撕去，貼上自家製的織章，「真．把能」就是這樣煉成！ 而家市集除咗有 「把能」，仲有「勁揪」、骷髏頭、和平符號嘅織章任君選擇，要設計一對自家版權嘅波鞋真係話咁易！至於賣到斷市嘅嗱喳麻雀，仲接受小量預訂，或者可以好似小記咁落場過吓手癮，一路爆粗一路打冷震！而想要呢個「以夷制夷，寨上加寨」嘅紙袋，就要去市集購物，或者加錢都得！Studio Sorry更計劃遲啲舉行展覽，粉絲們想知詳情就要留意佢哋嘅Facebook啦！

今次嘅市集除咗本土嘢之外，仲有其他手作嘢，例如皮革製品，係由「匠角」兩位設計師Jack和Joe親手打造。Joe明白皮革背囊對於好多文藝女青年都感到好吃力，為咗保持輕身同埋文青感覺，佢就諗到用帆布結合皮革製造背囊，小記試過之後都覺得背囊超靚，愛不釋手。

另外市集仲有市面上好少有嘅乾花水晶飾物，係由花色控製室乾阿瑩自己設計，自己做。佢除咗平時做手作，仲會開班教授乾花飾物班，等更多人認識乾花嘅手工藝術。而Klassglass嘅手工玻璃飾物，係香港就好少見到。設計師仲做咗一系列嘅玻璃吊墜，係小小嘅玻璃裏面可以窺見整個宇宙，十分精緻。同埋Yplus7880嘅木製彩繪頸鏈，設計師靈感採自大自然，花咗4至5個鐘雕刻同繪製，每一個都係心血結晶，背後仲有天天星星嘅圖案，絕對係誠意之作。

Fashion‧Design Mart 2016

日期：7月15至7月17日

時間：11:00am-10:00pm

地點：尖沙咀漢口道18號K11 1樓至2樓