無懼大汗　Solio除味有法寶

夏日炎炎，曬就預咗，流汗亦在所難免。出完一身汗，跳上車，最尷尬可能就係臭汗味，開窗又熱死，開冷氣就臭死，點算好呢？ 今次測試嘅鈴木（Suzuki）Solio Mild Hybrid，冷氣系統多咗nanoe納米離子空氣清新功能，夏日炎炎幫到手，有咗佢，車廂空氣都清新啲。簡單嚟講，呢項新功能可透過由空氣中嘅水分釋放微粒離子，中和皮膚及頭髮嘅弱酸性，達到抗菌防臭功效。

就算辟到臭汗味，但係太陽依然曬得很，莫講話戶外紫外線指數高，入到車廂，陽光照樣由車窗直接射入嚟，點算好？Solio Mild Hybrid嘅兩邊後門都有遮光簾，需要時可以拉起，前門玻璃車窗及前擋風玻璃，有效減少紫外線達99%，同時減少紅外線進入，既可阻隔陽光直射，又可減少猛烈陽光帶嚟嘅傷害。換句話講，拍住Solio Mild Hybrid結伴出遊，載住屋企人甚至女神遊多幾轉車河，齊齊同陽光玩遊戲，I Mean玩「伏匿匿」呀，點計都無得輸！

車價方面，Solio Mild Hybrid只售$183,800，賣到咁平，會唔會好齋先？ 唔使擔心，呢款車唔只有全自動nanoe納米離子空氣清新功能，又有免匙開門及免匙引擎啟動、電摺鏡、雙電動趟門，加埋7吋輕觸屏幕連後泊鏡頭等等，設備可謂應有盡有。而且Solio素有空間王嘅美譽，擁有2,515mm嘅特長車廂，以及多達1,360mm嘅車廂高度，配合Walk-through平地台設計，以及多變嘅座椅配置，前座乘客席又有手提儲物匣，空間寬敞又實用。至於雙電動趟門加埋360mm低地台離地距設計，大人小朋友都可以輕易出出入入。

性能方面，1.2公升Dual Jet引擎嘅最大馬力有91ps，扭力就有110Nm，配合CVT無段變速自動波箱，起步、加速都算順暢，而且有ISG內置式電動摩打及鋰離子電池組成嘅Mild Hybrid系統，加埋Idling Stop引擎怠速自動熄火及ECO-COOL系統，試足兩日車，走勻港九新界，全程開冷氣，大約行咗270km，本來滿油嘅油錶，交車時只係微跌兩格，夠慳家！

規格表

車型：五門五座位揭背車

引擎：直四

容積：1,242c.c.

最大馬力：91ps/6,000rpm

最大扭力：12kgm/4,400rpm

驅動：前置引擎、前輪驅動

傳動：CVT無段變速自動波

懸掛：（前）麥花臣、（後）扭力桿

制動：（前）通風碟、（後）鼓式

輪胎：（前、後）165/60 R15

平均耗油量：28.3km/L（日本JC08模式）

車身體積：3,710×1,625×1,745mm（長×闊×高）

售價：HK$183,800

查詢：2332 0091（香島汽車）