為食妹妹遊北角　肉食女VS素食女

20160729
  • 東網電視
    更多新聞短片
    今次帶大家嚟北角，無論食素定食肉嘅絲打巴打都會流晒口水！
    食菜定食肉？簡直係魔鬼同天使之爭！今次為食妹妹就喺北角搵到HK$3隻任食水牛城雞翼，同埋超香口素食煎釀三寶，無論食素定食肉嘅絲打巴打都會流晒口水！
    肉食女第一站：Smoko
    Smoko即係咩？原來係澳洲俚語指「煙Break」或者「Tea Break」咁解！呢間咁chill嘅coffee shop由曾經在澳洲生活的老闆阿Wing所開，憑着她對咖啡的熱情加上一班親切活潑的員工建立了呢間充滿澳洲Style的Smoko，希望畀大家Take個靚Break咁話！為食記者青尼試飲了人氣Tap Coffee，即是加入氮氣的咖啡！咖啡面層有猶如啤酒般的豐厚泡沫，老闆阿Wing話為咗令客人更易接受，加入埋青瓜糖漿搖勻，令輕盈嘅Tap Coffee添加一份清新，入口果然有種田園氣息，令小記暑氣全消！為食記者畸田就試咗蟹肉牛油果牛角包，入面充滿住豐盛的蟹肉，加埋牛油果入口滿載鮮味，飽肚得嚟又唔高卡，做個肉食女都唔錯，嘻！
    Smoko
    地址：北角炮台山宏安道2-12號宏暉商場地下8號（港鐵炮台山站 A 出口）
    主打：蟹肉牛油果牛角包（連LATTE HK$55）、TAP COFFEE（REGULAR HK$42）
    推介度：4粒星（5粒星為最高）
    肉食女第二站：麥記美食
    嚟到肉食女小食之選麥記美食！呢間入選米芝蓮嘅小店設有路邊坐位，一邊望住大馬路的貨車經過，一邊食小食，別有一番「風情」。麥記美食出名食生煎包和鍋貼，究竟味道如何？我哋兩位小記就覺得生煎包的底部煎得非常香脆，加上誘人金黃色，油勁十足。而包身的質感就有如饅頭那種，偏厚硬和帶甜。相比之下，鍋貼就更佳。雖然不算皮薄，但底部同樣煎到金黃色，十分脆身。而且餡料仍有肉汁，功夫實在不簡單。
    麥記美食
    地址：北角堡壘街21-23號美嘉洋樓地下（鐵炮台山站 B 出口）
    主打：鍋貼（HK$10/4隻）、生煎包（HK$10/4隻）
    推介度：3粒星（5粒星為最高）
    肉食女第三站：The Big Bite
    咩話，HK$3一隻水牛城雞翼？唔怪得排隊排到第二區啦！原來呢間The Big Bite逢星期二晚六點後，只要嚟買一枝啤酒，你就能以HK$3點選任何口味的水牛城雞翼，但最少要點六隻。而雞翼都唔兒戲，有齊六隻味：蜜糖蒜茸、Homicide、中間酸辣、微酸辣、一般酸辣及BBQ醬，緊有一款啱你班食肉獸心水！兩位為食記者最鍾意蜜糖蒜茸味，蜜糖味道足，而且炸得啱啱好，HK$3價物超所值。隊番杯本地啤酒，現場氣氛勁好，難怪可以做出賣2,000隻雞翼的記錄！
    The Big Bite
    地址：北角渣華道196-202號嘉富大廈地下4B號（港鐵北角站A4出口）
    主打：HK$18無限次柯打炸水牛城雞翼6隻（必須先點一支啤酒）
    溫馨提示：優惠時段逢星期二晚6pm
    推介度：5粒星（5粒星為最高）
    素食女第一站：素食分子（蛋奶素餐廳）
    邊個話素食一定係死板？真係要帶佢過嚟素食分子睇吓。呢間新派素食餐廳將素菜玩得出神入化，仲兼賣份子雪糕添！其中以50%黑松露醬入饌系列更是人氣之選。老闆透露而家餐廳已開始自家種植水耕菜，遲啲可以玩即割即食，令人好期待！為食妹妹青尼同畸田試食人氣黑松露蘑菇包，採用了黑松露、蘑菇、牛肝菌、雞肶菇等多種菌類做餡料，整個包外表勁似真冬菇，連坑紋都做得好細緻！老闆話堅持唔用味精，但入面的餡料炒得好香口，味道豐富，完全不需要依賴人工添加品都可以好好食！
    素食分子
    地址：北角堡壘街2-4號地下（港鐵炮台山站B出口）
    主打：黑松露蘑菇包（HK$48／3件）
    推介度：4粒星（5粒星為最高）
    素食女第二站：素食主意Sooo Vegi（蛋奶素餐廳）
    又番嚟素食女嘅主場喇！呢間主打外賣嘅素食主意由姊妹Bernice和Gigi經營，最出名係素食煎釀三寶同墨西哥風味卷，以中西合壁嚟推廣素食！素煎釀三寶的素魚肉來自台灣，以素蠔油加麻油來煎香。為食記者青尼一試發現茄子煎得勁香口，肉汁仍在不斷流出來。而素魚肉同一般素肉相似，即是如豆腐渣的質感。雖然當一般食彈牙的魚肉不同，但此素肉吸汁一流，好好味！另外，墨西哥風味卷入面有牛油果、紅腰豆及生菜等材料，加埋芝士同素肉醬真係惹味十足，鹹香味誘死人，正！
    素食主意Sooo Vegi
    地址：北角電氣道254-280號華凱大廈A座6號舖（港鐵炮台山站 B 出口）
    主打：煎釀三寶（HK$28）、墨西哥風味卷（HK$32）、猴頭菇合桃眉豆湯（HK$20）
    推介度：4粒星（5粒星為最高）
    素食女第三站：福元湯圓
    想做個清心寡慾嘅素食女，仲可以食碗消暑桂花酒釀丸子，享受清新花香同人手搓出嘅煙韌湯丸！湯圓賣相吸引，粉紅色、淺綠色加上白色的小丸子配搭桂花花瓣，詩意十足。天然的桂花甜味加上煙韌的小丸子令人暑氣全消，十分清新。
    福元湯圓
    地址：台山福元街7號利都樓地下I-1舖（鐵炮台山站 B 出口）
    主打：桂花酒釀丸子（HK$22）
    推介度：3粒星（5粒星為最高）