慳錢先決　集運前必知的5件事

好多人都會喺淘寶掃貨，直送香港雖然夠快，不過搞到成本大增！想又平又快嘅話，就一定要用集運服務，無論私人集運或者淘寶官方集運，都有唔少竅門，學識以下5招，自然「淘」得開心又稱心！

1. 單件運都抵啲

淘寶多平嘢就係人都知，不過唔少人為求方便都會揀直送香港，但係好多舖頭就提供內地「包郵」即係免運費，直送香港變相用唔到呢個優惠。而直送首1kg重運費已經要大概HK$30，如果買啲幾蚊、幾十蚊貨仔嘅話，運費隨時貴過件貨。相比集運，用家除咗可以享受到內地免運費優惠，一般集運店例如著名集運店「廣州集運專線（舒麗琴）」首1kg都只係20元人民幣，之後每kg 6元人民幣，計返收費都只係HK$23。而且玩親淘寶嘅朋友都會一次過喺幾間唔同嘅店舖買嘢，假設我喺3間唔同嘅舖頭都各買一件普通T-Shirt，如果全部都用直送香港嘅話，加埋運費就要成HK$100；但改用集運將貨物Group埋一齊運落香港，就只需要畀一次直送香港嘅運費，以上述例子畀盡佢2kg重都係26元人民幣，計落都只係約HK$30，平7成喎！

2.「送上門」喺公司收

但要留意，集運服務好似內地店舖「舒麗琴」或者香港公司「Dimbuy」等等，運到工商業區或者住宅地址嘅費用都會差好遠，就以Dimbuy為例，同樣「送上門」運去指定地址，工商業區就收首1kg HK$25，續重每1kg HK$9。但運去住宅區的話，就變咗首1kg HK$49，續重1kg HK$9，所以可以的話，就梗係叫佢送嚟公司。

3. 自取地點要就腳

唔方便喺公司收貨，屋企又成日冇人收貨，再加上件貨又唔係太重嘅話，當然仲有方法。一般集運公司都會提供自取地點，好似越豐集運就有21個自提中心，雖然好多大區都有，但位置就唔多近港鐵站，如果住得近嘅就冇所謂。而Dimbuy就可以喺自家物流服務中心攞貨之外，就連中石化油站、順豐站、OK便利店等都得，當中應該以OK便利店最就腳，冇營業時間限制，但要留意運費變咗HK$36/2kg、HK$47/3kg或者HK$72/6kg，如果超過呢個重量嘅話就幫你唔到喇！

4. 存倉過期即收錢

集運原理就係將唔同店舖嘅貨品集中運去同一個地點，但係因為唔同店舖嘅發貨速度，好似貨物缺貨、店員手腳慢等，加上採用速遞公司嘅效率有唔同，所以送到去集運公司喺內地倉庫都有先後。要留意就係，部分集運公司會設有存倉費用，例如Dimbuy嘅小型貨件就提供10日免費存倉，越豐集運就提供20日免費存倉，前者逾期每日每件貨件收HK$7存倉費，後者就收10元人民幣存倉費，都乸利㗎！

5. 貨物Size要睇清

唔少都會喺淘寶買啲大型物件好似傢俬等，諗住用集運就一定掂。其實同一般速遞、運輸公司一樣，集運公司除咗會計算貨物實際重量之外，亦會睇埋「體積重量」，即係貨物嘅體積，一般就係以國際航空運輸協會IATA之計算方法，亦即以厘米作為單位，將貨物嘅長、闊、高度相乘，再除以6,000就係體積重量。就以一件長闊高都係50cm嘅傢俬為例，體積重量大約係20.8kg，而本身實際重量就只係5kg，但集運公司就會以兩者中較重嘅數字去收費，所以唔好以為買啲又大件又輕磅嘅物件就抵呀！