MEDICOM TOY歷年8款最貴BE@RBRICK

如果你認為由玩具廠牌MEDICOM TOY於2001年首度推出的BE@RBRICK只係一嚿膠的話，咁你就未免太睇小呢隻玩具熊嘅吸引力，自15年前推出至今BE@RBRICK外型一直無變過，人氣亦一樣無滑落過，最常見size分別為100%（約7cm）、400%（約28cm）及1000%（約70cm）3種，品牌方面除了每半年推出一個定番系列（剛於6月推出的為Series 32）之外，更會不定期與時裝品牌及潮流單位聯名合作，於BE@RBRICK之上加入各種搶眼圖案及獨特素材增加其吸引力。近日品牌更發布將於11月推出採用陶瓷打造的BE@RBRICK 400%，創意同定價同樣屢創新高，留意番，以下介紹全部為日本原價，但咁罕有限量的特別版BE@RBRICK基本上都好難原價入手，炒高一兩倍係好正常！今回就同讀者溫故知新介紹近年MEDICOM TOY曾經推出的天價熊！

K.Olin tribu x BE@RBRICK 400%

驟眼睇隻400% BE@RBRICK同平時常見的設計無乜分別，以為係普通白色膠版本而已，但當知道呢隻其實係由法國陶瓷品牌K.Olin tribu所打造的陶瓷版設計後，就即刻有驚為天人之感覺，於保持熊仔形態下只需轉換物料，一下子就可以將大眾眼中的玩具升格為藝術品，BE@RBRICK吸引力莫過於此。

Zebrawood BE@RBRICK 400%

自早期同KAWS「交叉」合作採用木材製作出特別版BE@RBRICK後，MEDICOM TOY不時都有推出木製版本（主要為400%版本），早前品牌為MEDICOM TOY PLUS開幕就特別打造呢款以斑馬木製作而成的400% BE@RBRICK紀念版本，每隻熊仔身上都有一獨一無二的木紋，實屬鬼罕之物，將日本職人精細工藝完美融入到400% BE@RBRICK。

Woven Wood BE@RBRICK 400%

一身搶眼菱格紋的木製400% BE@RBRICK，是今年MEDICOM TOY特別為20th Anniversary Exhibition特別打造的紀念單品，深淺木紋色調營造出藝術感的菱格圖案，加上無可挑剔的木材質感及切割打磨，貴係有道理的！

AMIREX x BE@RBRICK 400% Dry Carbon Red

BE@RBRICK最有吸引力的地方就係佢由始至終都係得一個樣，但換吓顏色換吓物料就可以歷久如新，2014年時，品牌就找來日本創意單位AMIREX合作，推出採用碳纖維製成的400% BEARBRICK設計，將呢種常用於賽車及航空業的高級素材活用到設計之上，相信喜歡超級跑車的男士們一定好鍾意。

AMIREX x BE@RBRICK 400% Aluminium

於2012年MEDICOM TOY Exhibition上，品牌就聯同日本創意單位AMIREX攜手打造出呢款採用Aluminium（鋁）製作的超墜手BE@RBRICK 400%，筆者有幸將實物拎過上手，確實係好重手，所以佢嘅定價就要高達JPY$525,000（約HK$40,200）。

Piano Black Wood BE@RBRICK 400%

有彈鋼琴既讀者都知道有種木材被稱為鋼琴黑木，高度拋光的木材表面營造出高貴質感，2009年時，MEDICOM TOY就曾以這種高級木材打造出型格十足的黑木版BEARBRICK 400%，接近十萬日圓定價（JPY$99,750）真係要好Fans先買得落手。

Layered Wood BEARBRICK 400%

於2008年推出的Layered Wood BEARBRICK 400%，當年限定推出150隻，是品牌早期推出的木製版本BE@RBRICK當中最經典的一款，因為整隻熊仔由深淺色調木材壓製而成，可能有人會嫌不是原木製成，但如果你見過實物的Finishing（我見過，我真係見過！），特別是頭部以不同色調造出的熊樣，相信你都好想帶佢返屋企。於2015年11月，品牌更追加推出BE@RBRICK 1000%版本，售價就要JPY$600,000（約HK$45,940），連埋裝住隻熊既木箱重量就有成30kg，相當誇張！

LOVE IS BIG LOVE IS BE@RBRICK 1000%

唔知大家有無發現呢啲用上珍貴物料打造的特別版，通常都係出400%版本？相信主要係因為成本同造工關係，就算做得到1000%版本定價都會好貴。但講到BE@RBRICK 1000%最多人夢寐而求的都係2007年由MEDICOM TOY同海港城攜手為香港血癌基金慈善拍賣所打造的十隻時裝品牌聯名版本BE@RBRICK 1000%，當時每隻拍賣底價為HK$50,000，成交價好多都超過六位數字，到今時今日我諗無二、三十萬都好難有人會割愛。