農曆七月 十大旅行注意事項你要知
20160815
東網電視
更多新聞短片
七月十四，旅遊都係小心為上！
8月的暑假黃金檔期，唔去旅行對唔住自己。之不過撞正農曆七月，莫講話出遠門，連落街都有點避忌。雖說信則有，不信則冇，但有些事，做了總比沒做好。尤其去到異地，還是注意一點吧。除了大家聽慣聽熟的「唔好住尾房」同「入房揚聲」外，以下列出幾個外遊時的注意事項，作為參考。
10大注意事項你要知
旅店篇：
唔好有吉床
一個人去旅行，未必成日可以分到單人房。如果分到Twin Bed房時，建議翻亂另一張吉床的被鋪，最好將日用品、衣物等放在床上，話畀「小東西」知你來入住同借宿幾晚。如果唔係，「小東西」會在不知不覺間睡在吉床上。另外，「小東西」都喜歡依牆而住，有得揀就揀睡在近窗口的床吧。
衣衫勿放入衣櫃
不少人（包括筆者），每次入到客房都會好自然地將衣物掛在衣櫃裏，但原來衣櫥陰氣一樣好重，「小東西」都可以穿着到。建議將衣物放在房內的梳發或枱上。如果真係好想放在衣櫃內，可以將衣物對摺晾，咁「小東西」就唔會着到喇。
護身符未必是好事
出外旅行，就算不是因為宗教信仰，好多人喜歡隨身帶備護身符。原來護身符未必咁護身。曾經有人試過出Trip時，半夜時分被坐在梳發上的「小東西」驚醒，秒速在銀包拎個護身符出來兼念心經，點知「小東西」慢慢走過來，仲好得戚地話：「你同我講嘢呀？我唔驚呢啲嘢呀。」嚇到那位先生即時要求換房！
開燈瞓 冇咁驚
睡覺時開燈，除了令你心理同視覺上冇咁驚之外，亦是一個告知「小東西」你還在客房的辦法。如你一關燈，它們會以為你已經離開，便會開始「出動」，無心之失嚇親你就唔好喇。
浴缸不要有水
出外玩了整日，知你好想來個浸浴紓緩疲勞。但浸浴過後最好記得馬上將浴缸的水放走，千萬不要留過夜。有說缸內的水會成為「小東西」進出靈界及現實世界之門。
觀光篇：
入夜後不要玩水
夏日炎炎，去陽光與海灘之地度假，諗起都梳乎。玩還玩，入夜後就最好不要走近有水的地方，如泳池、湖邊等。水一向都容易招惹「小東西」，夜媽媽去沙灘看似好浪漫，但泳客冇，救生員又冇，有咩事的話，大吉利是喇。
不要捉小昆蟲
小昆蟲如飛蛾同蜻蜓，一向都是「小東西」附體之身，加上正值農曆七月時分，如在公園或其他郊外地方看到飛蛾或蜻蜓，最好不要觸摸，更加不要因害怕小昆蟲而殺生，否則後果自負呀。
有聲手信唔好買
去旅行買吓手信好正常，但不是每樣手信都可以買。如二手市場的公仔、洋娃娃等，雖然罕有，但唔知咩人擁有過，又唔知會唔會邪靈附身，忌買。另外會發出「鈴鈴」響的首飾同風鈴也最好避之則吉，聞說「小東西」都喜歡鈴鈴聲，把「聲音」帶在身，同招魂沒有分別，真係好惹火。
不要「順手牽羊」
不是偷東西的「順手牽羊」，而是某些著名景點的東西，絕不可順手牽羊帶回家。如夏威夷的熔岩沙石，聽聞夏威夷的火山女神Pele，視熔岩沙石為自己兒女，因此拿了會遭遇不幸事件；又如羅馬尼亞的木頭，據說木頭是驅趕吸血鬼的武器，如帶回家會好容易招惹它們的邪氣。
影相要小心
出外旅行當然咩都影得餐，但寺廟內的佛像同墓碑就建議唔好舉機。佛像是神聖之物，本來就不應冒犯。而墓園、紀念碑等歷史景點內，即使幾有人氣，都住了一班仙人，舉機影相的話，有機會攝走靈魂，變相你把它們帶回家。