槍林彈雨間之潮流小店OVERLAB

鍾意打War Game的朋友對旺角槍街（廣華街）一定唔會陌生，短短的橫街之內除了有多間專營氣槍及軍服的War Game用品店外，連手辦模型、遙控車同貴價腕錶等等所有「男人浪漫」都可以在裏面找得到，而是次想介紹的潮流小店OVELABE就正正係呢個男人銷金窩的核心內圍。

由主理人奇寶打理的潮流小店OVERLAB，位於廣華街仁安大廈地舖，店內一木一草（真係有草！）皆由佢費盡心血打造而成，於今年一月開業至今已經於區內擁有相當人氣，店中主打一系列美國街牌，如Supreme、DEEP、CIVIL、Champion、Eastpak及近期人氣爆燈的RIPNDIP等，而台灣街牌LESS及日本街牌LAFAYETTE同樣被引進店內。

但最齊貨的必定係Supreme同RIPNDIP呢兩個品牌，前者Print Tee及Camp Cap當然唔會少，更甚係OVERLAB更有一個玻璃櫃擺放過去Supreme所推出過的小物擺設，之前錯過的哪季哪件可以自己去碰碰運氣；後者憑着一隻中指貓更被全城瘋狂追捧，OVERLAB亦早着先機一早將全線系列單品包括早前RIPNDIP洛杉磯Pop-Up Store限定款式都帶到香港，店內更滿布RIPNDIP中指貓蹤影，潮流貓奴要入貨就請便啦！