小心！開學日實畀訓導捉硬的儀容細節

問10個學生學校邊個老師最乞人憎，9個必答你非訓導主任莫屬，就以開學日為例，莘莘學子一進入學院大閘的那一刻，快過機場金屬探測器嘅訓導就會一次過捕捉晒你身上唔符合校規嘅地方，晨咁早一對金睛火眼Scan晒幾百個學生，都算係敬業樂業！好喇，就算俾畀你偷到雞入到閘返到課室，你新一年嗰個班主任或者路過的Miss阿Sir都很有可能係無間道，有吉士者固然又立即逮捕你，淆底者就會笑笑口扮無嘢，轉個頭卻立即喺訓導面前篤你背脊，認真乞人憎！

不過，老師們做咁多令你唔開心嘅嘢，其實都係想大家整整齊齊、容光煥發咁返學，明明想你好，卻偏偏要畀你憎埋，都算係用心良苦，以下開學日實畀訓導捉硬嘅儀容細節，就一定要小心同注意喇！

一‧頭髮

絕對係訓導睇得最緊的一個部分，始終經歷了兩個月的暑期，髮型老早就唔同晒，是故男學生就睇下佢地頭髮有無過長，有無掂到恤衫領和遮到耳仔（當然gel頭就1年365日都唔畀！），女嘅就當然睇吓頭髮有否染色，如發現有問題者，輕則叫你放學時Salon自己搞掂，重則就由訓導「的」你去房仔親自幫你搞掂，搞完出嚟嗰頭真係唔變一個數目字都唔得，記者當年就有一個男同學曾經因為畀訓導剪得太狠，最後佢傷心過度逃學咗一個星期，真起諗起都好笑！

二‧耳窿

除咗染髮之外，好多學生鐘意喺暑期釘耳窿，開學日詐詐諦戴返學搏見唔到！有啲就會穿番住透明耳針入去，以防耳窿埋口，不過，班老師都係會發現的，所以往往未到重陽，嗰耳窿就埋口了！

三‧塊臉

這裏泛指塊臉及眼、口、鼻等一切，通常是衝住女生而來（當然，都會有男同學鍾意畫眼線的，但通常呢類唔會係訓導跟進而係交咗畀駐校社工。），胭脂、粉底、紅唇、眼影、大眼Con以至假眼睫毛，是但一樣捉到都話要見你家長。

四‧裙、底衫

學校係一個莊嚴的地方，女生着得太性感當然唔得（呢度唔係東京呀！），是故裙太短唔得、唔住底裙唔得、唔着底衫成個Bra咁透視晒出嚟就更加會畀人罵，不過這些都是相對敏感的部分，所以老師好少大庭廣眾咁捉你，不過小記就真係聽過一個真人真事的笑話，話某中學一個很有威嚴的男訓導主任有一日喺操場早會上，講咗一句引來滿堂大笑的說話：「今日我發現有好多女同學無遵守校規，喺我從樓梯度望上去嘅時候，我發現到好多女同學無着底裙......」之後，他就靜了。

五‧鞋、襪

至於足部也當然唔少得，例如喺好多中學入面，都唔畀學生着一些最正宗的皮鞋，首先真皮就一定唔得、皮鞋底唔係話唔得、鞋頭太修長又話唔得，拋咗光嘅就記你大過都似，總之就是要逼你着一些低B「清純」膠皮鞋先至收貨，都幾本末倒置。而襪方面又係無聊，啲老師往往會失驚無神扯高你的褲頭，話睇下你對襪係咪白色，就算係白色又要睇下有無Logo喎，呢樣就真係Over咗囉！

六‧褲腳

而褲頭就仲搞笑，其標準基本上係根據潮流而定的，例如潮流興闊，佢哋就唔畀你闊；到流行窄的時候，又會話窄唔符合校規標準，所以話平時睇落無咩「啡唇Sense」的老土訓導，原來暗啞底先至係時裝精呀！