身在香港認真幸福，街頭小食可謂隨手可拈，咖喱魚蛋、燒賣、雞蛋仔，到底哪款才是你的最愛？計我話，就揀鬆脆美味又飽肚的格仔餅，不過吃得多花生醬加煉奶，總有點悶，不如試試新口味？雞蛋仔專門店Modos最近就在銅鑼灣開設新分店，一向多古靈精怪新口味雞蛋仔，不過今次就玩格仔餅，兼格勁厚、爆餡的。鍾意宇治金時的，又怎能錯過抹茶紅豆格仔餅？即叫即整的格仔餅粉漿特別拌入日本抹茶粉，食落有陣陣抹茶香，中間就夾入爆多的紅豆蓉，老闆特別揀選來自韓國的紅豆蓉，雪至凍冰冰，味道香甜但不膩，一次過吃到冷熱質感，正。

另外兩款新口味還有玉桂蘋果及金莎朱古力醬，前者用青蘋果加普通蘋果切粒，煮成稠身質感，味道清酸夠開胃，又不怕過甜；至於後者就用榛子醬加朱古力醬混合而成，再加入脆米，添加卜卜脆的口感，味道香濃，有夠邪惡！三款格仔餅都非常厚身，加上爆多餡料，最好就兩個朋友些牙，否則一定勁飽。