劏房業主必讀　裝設電視5大注意　

買樓難，就算買到隨時都只是蚊型蝸居，客廳深度只有4、5呎，應該選擇幾大部電視？距離點計？小記就訪問了英京影音的電視專家李樹生，提供了五大裝置電視貼士，只要大家跟着貼士裝電視，就不會搞到畫面太近睇到暈，或裝得太遠令螢幕太細無晒震撼感，同時更會照顧到位置、距離、水平及接駁問題，如你新居入伙準備買電視的話，就不能錯過了。

貼士一：用公式幫你計最佳觀賞距離

坊間有不少幫你計電視擺放距離的公式，但不是太複雜難明，就是距離預得偏鬆，沒考慮到港式細廳的實際情況，反觀李樹生提供的公式就簡單實用得多，只需將電視的對角尺寸乘以1.4就是最佳觀賞距離，例如電視是47吋，那麼就是47x1.4，即是65.8吋就是最佳觀賞距離，55吋電視就要預留77吋距離等等，非常簡單易明。

貼士二：用水平尺確保電視呈水平

無論你選擇將電視掛牆還是座枱，你自己裝還是拜託師傅裝，裝完之後都要記得用水平尺量度一下電視是否保守水平，只須將水平尺放在電視機頂，如尺內的水滴停留在中間位置，就表示電視擺放呈水平；如水滴偏向一邊的話，就可能要將座枱架或掛牆架稍稍墊高，令電視回復水平。

貼士三：掛牆時要預留空間散熱

香港寸金尺土，個廳細自然想偷位，將部電視掛牆是好方法，但要注意因為電視的散熱位大都設在機背，如裝置得太貼牆就會影響到散熱，令耐用性下跌，所以起碼要預留1~2cm空間。

貼士四：要預留HDMI接駁空間

新一代電視的HDMI插口位多設在機側或機底，令接駁時都不會浪費空間，但卻有少數型號會將插口設在正機背，如你買的是這款電視的話，機背與牆壁之間就要預留起碼4cm，否則就會不夠位駁HDMI線的了。

貼士五：曲面電視預鬆觀賞距離

不少人揀電視都會喜歡曲面電視，貪它外形夠型，畫面亦夠靚，但要留意一般人睇曲面電視時，因為螢幕呈曲面包圍狀，故睇落會覺得畫面比同尺寸的平面電視更大，所以裝置時觀賞距離預鬆點，將畫面尺寸乘以1.4，再加多兩至三吋就會睇得更舒服。