男人聚會　色性忘年會

首先，「忘年會」同忘年戀一啲關係都冇，而忘年會其實即係我哋所講嘅尾禡或尾牙咁解。日本嘅組織同機構喺每年年尾都有舉辦忘年會嘅傳統，既為一年成績進行總結，同時又可以聯誼一下。按日本人嘅習慣，忘年會一般都會喺居酒屋舉行，而呢種職場社交活動係咪只會飲飽食醉咁簡單呢？

99%日男去完忘年會後……

日本職場男性本身平日應酬多，家陣攞正牌同班同事及高層去飲酒，梗係有咁盡飲咁盡，只係飲完酒會做啲乜？調查網站「Tell-me」早前就以「男士喺忘年會後會做啲乜？」為題進行調查，結果有99%嘅男士表示會去風‧俗‧店！最有趣嘅係每個人嘅理由都幾乎一樣，就係由於好多時係上司或同事提出，如果唔去嘅話即係唔畀面同唔合群喎！講到好似被迫咁，唔鍾意咪去囉！

風俗店搞忘年會

既然日男去完忘年會後鍾意去花弗下，風俗店又點會唔識做？更何況每年年底都係佢哋衝業績嘅日子，紛紛推出各種打住感謝祭嘅割引活動嚟吸客。

不過講到最爆嘅，就係有啲風俗店舉辦埋忘年會，等一眾玩家可以喺度聯誼下，跟住再同風俗孃有下文。好似位於日本千葉縣船橋市嘅美少女出張風俗店「船橋私立Pacopaco學園」，每年都會舉辦忘年會，讓玩家可以盡情玩餐飽。

今年佢哋更以聖誕做主題，喺風俗店附近嘅居酒屋搞放題，玩家只需畀8,600日圓（約HK$588）就可以飲飽食醉，仲有美少女風俗孃一齊玩，不過大家唔好諗多咗，只係齋玩咋。而呢類風俗忘年會人數有限，一般唔會多過20人，要報名就要趁早喇！

風俗孃到會助慶

如果公司清一色係男人，咁舉辦忘年會嘅話，未免太過單調咗啲，想搵多啲陰氣嚟提升現場氣氛嘅話，日本風俗店亦可以幫到手，好似呢間位於埼玉縣出張風俗店「Madonna」就有為忘年會、聖誕派對、酒會等宴會提供嘅風俗孃派遣服務。要出得大場面，風俗孃個個嘅外形同氣質都有番咁上下，平均年齡由20至35歲，當中更有前AV女優招呼客人。

呢班風俗孃去到會場，並唔係飲飲食食同吹水咁簡單，仲會同男士玩遊戲。至於價錢，每位宴會風俗孃嘅收費，普通女伴為每2小時13,000日圓（約HK$888），超級女伴則為每2小時25,000日圓（約HK$1,708）。普通同超級有乜分別？分別咪在於後者有特別嘅服務囉！

玩家自發搞忘年會

日本有個好專業嘅風俗玩家組織叫做SOD覆面調查團，呢個由日本著名AV片廠喺2013年4月以1億日圓重金打造嘅風俗界報告組織，由眾多玩家所組成，只係佢哋同忘年會有乜嘢關係呢？原來呢個調查團每年都會自發舉辦忘年會，等一眾民間調查員可以聯誼一下。

佢哋搞忘年會幾特別，事關佢哋會約喺集中咗唔少風俗店嘅某幢大廈或地區集合，齊人後就分派每個調查員要去邊一間風俗店，完事後再到事先約定嘅居酒屋聚集，跟住佢哋就會邊分享邊評分，然後再玩遊戲，呢種娛樂不忘專業嘅態度，真係抵讚呀！

AV女優忘年會

每年年底雖然係唔少AV女優出騷嘅日子，但佢哋仍不忘聚埋一齊慶祝一番，好似一班日本AV片廠Alice Japan嘅專屬女優麻美由真、川上奈奈美、長瀨麻美、南麻友、皆野愛同森苺莉咁，每年都會舉辦圍內嘅忘年會。

圍內搞即係冇AV迷份？唔緊要，因為有AV女優亦會預埋AV迷一齊參加忘年會。好似巨乳熟女優折原由香里，就喺今晚7點於東京嘅中華料理店，舉辦名為「由香里之夜‧聖誕忘年會」。男士需畀13,000日圓（約HK$888），而女士則只需畀9,000日圓（約HK$614）嘅活動費，就可以同佢及一班AV女優玩餐勁啦。