超合金魂百獸王　足秤回歸

好嘢，果然係留番壓軸上場，大家期待已久嘅超合金魂百獸王，趕得切喺2017年之前到港上架，唔少70後、80後都視為志在必得嘅神物，你又入咗貨未？可能90後嘅朋友會有所奇怪︰百獸王有幾巴閉？話說佢源自1981年嘅同名動畫（香港又有人叫做「金剛戰神」），五獅合體呢個概念已經夠出位，同期推出嘅超合金亦高度還原，被奉為玩具界嘅神物。想當年，有幾多人買得起超合金，小編當然都係一分子；大個咗，想後追就更難，當年初版故然炒上天價，最大問題係即使Bandai喺1997年開設「超合金魂」，但係由於《百獸王》嘅版權一早賣斷畀海外公司，唔只玩具迷，B記一直都想打百獸王主意，都因為呢個原因而不得要領，好彩皇天不負有心人，《Voltron》（百獸王海外版嘅名字）喺今年畀史匹堡夢工場旗下嘅版權公司Classic Media收歸旗下，推出新動畫之餘，仲重整周邊商品嘅版權安排，B記亦都把握機會傾掂「拉臣」，大家等咗接近20年嘅超合金魂百獸王，終於夢想成真！

講咗咁多前文提要，依家入正題，到底編號GX-71嘅超合金魂百獸王，幫玩具迷圓夢，還是噩夢？試玩過後，小編可以拍心口咁講︰堅得！首先，無論係超合金魂，或是掛上「Metal」之名嘅B記玩具系列，問心嗰句，含金量都少得可憐，難怪咁多年嚟都畀玩具迷戲謔為「超合膠」，B記終於憑百獸王做番次好戲，唔只機械人嘅主關節，黑獅子、藍獅子與黃獅子嘅四肢都係金屬製成，小編用電子磅量度，合體後嘅機械人重達1,417g，而且未連武器，墜手程度令人感動！

造形方面，超合金魂GX-71當然比35年前嘅初版超合金有型得多，整體線條與輪廓都有大翻新，例如機械人形態時唔再頭大腳短，獅子形態亦多咗唔少細節塗裝與刻線，尤其是機械人有兩款面相組件，唔再一個木獨樣之餘，換裝方法既簡單又實淨，下巴有一道橫線坑紋，由此輕輕一挖就得（記住係輕輕力，大力挖花咗唔好入我數）。此外，胸口中央嘅皇冠與十字架圖案係分件製作，表面又有電鍍處理，並非一塊過倒模再塗裝算數，誠意做到足。

與造型相比，GX-71嘅可動設計更加抵讚，先以獅子形態為例，四隻腳與軀幹嘅連接處，以至膝頭、足踝都可動，更大賣點係肩位與髖關節都可以拉出，令四隻腳可以呈現八字形站姿，呢項設計絕對係GX-71首創（題外話，喺超合金百獸王之後，有若干B記以外嘅公司出過合金類別嘅百獸王商品，不過款式唔多，而且質素參差），令五隻獅子可以擺出更自然、更有型嘅甫士，至於獅頭唔只可以上下擺動，仲追加咗左右轉動，加埋一大埋武器組件，淨係獅子形態都有排玩。

五獅合一後又如何？首先，膊頭與膝蓋呢四個連接位都好實淨，絕對唔使驚玩玩吓會甩手甩腳，玩家可以放心扭動。除此之外，膊頭、手肘、髖、膝與前掌都用咗齒輪關節，足以對應1,417g呢個重量，而且藍獅子與黃獅子嘅腰關節，合體後亦變成膝頭與腳掌之間嘅一組新關節，再添玩味。更要留意係藍獅子與黃獅子嘅獅頭變成機械人嘅前腳掌後，原本獅子胸口嘅外殼可以揭起，變成機械人嘅腳踭一部分，增加接地性。再者，腰位唔只可以左右轉動，又可以微微拗腰；大腿既可前後擺動，亦可向外拗。綜合而言，藉高可動而又穩陣嘅關節設計，小編深信GX-71係歷代百獸王合金產品之中可玩性最高嘅選擇。

講咗咁耐都係讚讚讚又讚，唔通GX-71真係咁完美冇缺點？咁又未必，建議零售價高達30,000日圓，要求高都係理所當然，就以進步幅度咁大嘅可動性為例，都仲有改善空間，包括手肘與腰位嘅扭動幅度。配件方面，即使大大把嘅十王劍係全膠製品，不過都有一定重量，揸喺手時未算穩陣；再者，如果多埋五位駕駛員嘅微型Figure，甚至說明書都有提及嘅合體鎖匙，咁先算功德圓滿，B記會否考慮以「魂Shop」形式出埋呢啲小配件，令一眾粉絲大滿足呢？不過，前題當然係定價唔好再咁進取啦！

查詢電話︰（852）2148 9483（精品）