波鞋達人教你分真假

農曆新年就到，人人都想入對靚波鞋過年，最慘係而家出親啲靚波鞋都相當難買，你以為畀多啲食炒就可以有心頭好靚波鞋上腳，Sorry你仲要面對係假鞋氾濫問題，一個唔該着咗假鞋上腳，仲點有面同啲鄉親父老拜年！

今回《東網》就特別邀請波鞋潮店Solefly兩位主理人Deano及威廉，教大家點樣可以分辨到YEEZY BOOST 350 V2 Beluga同Air Jordan 11 Space Jam呢兩款近期最多人想入手但同時又最多假貨的高危款式，等你唔使驚食炒買假咁陰功。兩款大熱鞋款分別有多個必須注要的細節位，而且不法之徒亦會不斷更新錯處，奉勸大家如有懷疑就無謂博，着少對唔會死，但着錯假貨就真係會瘀死！

【真盒假鞋】

好多人中伏買到假鞋就係因為心急走漏眼，所以就有不良賣家諗到用「真盒假鞋」呢招，甚至將真貨所使用的配件如：鞋撐及包裝使用的「雪梨紙」抽起，換落另一對假鞋出售，為加強說服力甚至會配上真的購買單據，所以就有人會於網上平台出售鞋盒連配件。順帶一提，國內好早已經有出售假的單據，資料有時正確無誤、有啲就錯漏百出，但共通點就係全部都印得好清晰，你諗下自己平時喺香港購物用信用卡，邊有資料會對晒位又好深色印喺單上面？所以如果想進一步確認賣家所售波鞋為正貨，不妨問多句叫對方出示購買確認電郵甚至郵遞貨單，如果對方賣的是真貨通常都會樂於出示以驗明正身。

【假波鞋網】

好多鞋頭都鍾意上網買波鞋，諗住都知自己着開咩Size唔使試，而在假鞋氾濫情況下亦引伸出好多假波鞋網，通常呢類波鞋網站都相當齊款齊Size，而且仲好多時會做特價，亦通常整個網頁都採用英文，當然所寫的都可能係一啲左抄右抄嘅資料介紹，但只要留意網址、聯絡方式（見到國內+86字頭可以話超過99%係假）同緊記便宜莫貪就絕對唔會咁易中伏，試問一對熱門炒鞋又點會平過原價出售？

【上網查證】

如果想入手的波鞋是購自網上賣家的話，在確認購買前可以嘗試去YouTube搵同款鞋的分真假Video睇吓，用Legit Check或者Fake等字眼加上你想買的波鞋，基本上都會搵到好多，再唔係可上國內某知名購物網站搜尋鞋款，記下假鞋特徵以作比對亦可。如果想再三確認真假，可以要求賣方提供近距離拍攝的細節位照片，交收前於不同波鞋論壇、社交群組（如：跳跳人研究室及KICKZ-LAB波鞋討論/報料區等等）開個Post叫各位師兄幫吓眼，通常禮貌查詢都可以得到師兄幫忙回覆。

雖然此方法都未必一定行得通，因為賣家立心不良一樣可以真相假鞋，但如果齋睇相都發現假就唔使約時間交收，因為時間就是金錢！而如果購入的為二手波鞋就更加要留心，因為某些識別真假的細節位可能會經着用後而變得不明顯，所以如有懷疑就寧願唔好買，買少對好過對住對假鞋眼冤。