巡場男：拜年不求人　大容量外置電隨身充

下個星期就到農曆新年，巡場男當然未有咁早「收爐」，繼續落場幫大家搵筍貨。大家都明白拜年會出成日街，始終都係手機不離手，萬一手機冇電，真係與世隔絕，所以今次巡場男就去到旺角星際城市，搜羅超過10,000mAh的平靚正「尿袋」，希望幫到大家頂足一日。

牛魔王Maxpower X1500+　5.2A雙USB輸出

上到星際一樓第一間舖，店員就推薦巡場男牛魔王Maxpower X1500+外置電池（售價HK$438），最大賣點係特設Quick Charge 3.0充電接口，配合總輸出5.2A的雙USB，加上擁有15,000mAh電量，能夠快速為手機反覆充電三至四次，而機面亦有電量顯示燈提示用家，並提供Type-C和Micro USB輸入，加上「尿袋」內置智能晶片，備有過充、過放、過流及短路保護，安全又可靠。

Anker Powercore 20100 超特大容量

再行多兩間舖，就見另一款「尿袋」Anker Powercore 20100（售價HK$395）標榜特大容量，電量高達20,100mAh，唔好講話充手機，甚至乎夠充兩次平板，而且體積和重量比Astro E6 20800細小和輕巧近三成。「尿袋」亦都提供雙USB接口，輸出高達4.8A，更內置PowerIQ智能技術，會根據不同裝置自動分配最大電力輸出，夠晒彈性。

Infinity-QC 812 六色外觀

由日本頂級設計師設計的Infinity-QC 812（售價HK$378），外觀時尚之又餘有六種顏色機身選擇，而且機身備有LED燈顯示0~100%電量，帶出街夠潮。雖然容量只有12,000mAh唔算特大，不過內置Qualcomm認可授權的Quick Charge 3.0，配合相容的裝置能夠極速充電，號稱比傳統充電速度快四倍，更具備多個國際頂級安全認證，使用就更加安心。

AMG 13,000mAh 韓製186g激輕

「尿袋」除了要電量大、充得快之外，畢竟要全日跟身，所以重量都好重要，而韓國品牌AMG 13,000mah（售價HK$368）採用韓製碳纖外殼，所以重量僅有186g，帶出街完全冇負擔。機面亦設有LED屏幕顯示電量，最特別是內置電流檢測技術，能夠顯示電壓輸出的流量，充電快慢一目了然，加上設有雙USB輸出，當中包括QC 3.0+2.8A max，快速充電冇難度。

ego PQ-12 呼吸之光

ego PQ-12（售價HK$378）之所以會叫做「呼吸之光」，皆因機身設有充電狀態呼吸燈，並以閃爍的快慢代表充電速度，而且支援QC 3.0輸入及輸出，當使用QC 3.0充電時呼吸燈會顯示綠色，而普通充電則會顯示藍色。至於機身厚度及重量分別有15mm和218g，而且至於電量提供12,000mAh，同時亦會有數字電量顯示，更備有八重安全保護。