出發前Last Call！鴨記SIM卡大搜查

依家去旅行最緊要係上到網，出發前買定張上網SIM幾乎同買定保險一樣是例行公事！小記就於深水埗鴨記一眾攤檔，幫你嚴選最抵玩嘅日本、韓國、中國及歐美SIM卡，Plan咗年初一出發嘅，即睇！

日本篇：全日通最抵

遊日SIM卡嘅選擇多到令人眼花，如果屬一星期左右嘅短Trip，「AJC 全日通」就最多人揀。「AJC 全日通」分為紅色及藍色兩種包裝，前者數據流量及時限為2GB/8天，2GB 數據為4G 網速，2GB後會限速200kbps，基本WhatsApp都夠用；後者時限7天，數據流量為每日215MB，超過215MB後才限速。受歡迎嘅主因係價錢抵玩，每張街價約HK$60，如果玩足7天平均每天開支都唔使HK$10；另一吸引之處是選用DoCoMo網絡，接收較穩定。

若然遊日時間較長，可考慮FREETEL上網卡，同樣使用DoCoMo網絡，使用時限分為14天及30天兩款。SIM卡雖然只得2GB數據流量，但使用facebook、WeChat、Line、WhatsApp四款Apps時不會計算數據用量，所以極之吸引。其售價則比「AJC 全日通」貴，14天及30天時限分別售HK$130及HK$180。

韓國篇：中移動吸引

遊韓國，小記推介中國移動嘅3G南韓7天數據卡，雖然只係使用3G網絡，但提供5GB數據用量，而且支援數據共享，特別在於喺韓國用唔晒嘅數據流量，香港一樣可以繼續用，直到用晒5GB為止。留意此卡公價HK$288，但於中國移動網站或者深水埗街價都有接近HK$100嘅折扣，街價約HK$160，慳好多！

中國篇：首選跨境王

北上探親或者避年，鴨記攤檔通常會推介中國聯通跨境王4G，街價大概HK$100，卡內設有HK$80儲值額，可用來作流動數據或撥號通話；亦可選擇其數據組合，例如300MB/7天（售價：HK$48）、500MB/30天（售價：HK$68），用法靈活。跨境王除咗可以喺香港和內地用到，最厲害係連澳門、台灣、日本都啱用，加上有效期有90天，可透過增值延長期限，新年去幾個地方就抵上加抵。

至於追求上網速度嘅北上人士，可選擇中國移動4G/3G內地10天數據卡，備有1.5GB數據用量，街價約HK$90。

歐美篇：3儲值卡熱賣

新年遠征歐美，美國方面可選擇較為熱門嘅Ultra Mobile Data Plus，30天時限提供4G及3G各2GB 數據流量，而且可使用超過60 個地區免費長途電話，街價$180非常好用。想嚟個雞年歐遊，鴨記攤檔推薦由英國3 推出嘅4G儲值卡，分為1GB/30天（售價：HK$60）、3GB/90天（售價：HK$150）、12GB/30天（售價：HK$280）三款，勁在涵蓋42個地點包括法國、意大利、西班牙、德國、荷蘭，甚至美國、澳洲、印度等，熱門旅遊地點幾乎有齊。