72變雞扒火辣雞槌 延續炸雞熱潮

20170210
東網電視
更多新聞短片
大大塊雞排同Juicy雞槌,你鍾意邊種多啲?

近年韓國炸雞在本港大熱,一間間新店開業都吸引大批粉絲蜂擁而至,搶去不少風頭。不過香港勝在各行各業百花齊放,食厭一種炸雞,仲有千千萬萬種。好似早前在旺角中心開新分店的台灣過江龍「魔法雞排」,就主打「72變雞扒」,有4種脆皮、3種口味再加6種調味粉,一共可以配搭出72款組合。以王牌多力滋雞排(定價HK$30)為例,將已調味的雞排蘸上粟米漿放入攝氏180度油溫的芥花籽油中炸4分鐘,粟米漿在過程會收縮,緊緊鎖住肉汁,入口相當Juicy!另一款「拍手雞排」(定價HK$30)就因為上粉漿時有「拍手」的動作而命名,炸完看上去炸粉好大塊,但其實咬下去鬆脆香口,皮薄多汁,皮肉不分離!老闊Anton特別講到雞排即叫即炸完,還要攤放一會,讓溫差將裏面的油分逼出來,入口香脆較不油膩。另外新店亦有新出品,名字霸氣的「義氣餃子」,原來是Anton的朋友生產了一批只有椰菜、韮菜和葱的素餃子,為了「捱義氣」幫朋友清貨,想到將餃子炸香後加上韓式甜辣醬和蒜蓉豐富味道,雖則無肉,但HK$25一大包有十幾件,相當抵食!

若然覺得台式雞扒太大塊食唔晒,一件件雞槌就應該啱晒。連鎖高級漢堡店The Butchers Club Burger最近就應農曆新年推出期間限定的火辣炸雞籃,賣點是用來自澳洲Hazeldene農場、無賀爾蒙的走地雞雞槌,配秘製香辣醃料,浸在由辣汁、紅糖和牛油調成的醬汁中,再配埋濃郁的藍芝士醬,多重口味勁Juicy!一籃6件定價HK$88,新年食到火辣辣,夠晒意頭!2月1日至28日期間,每日下午4點到晚上7點,更有Happy Hour優惠,HK$220有一籃炸雞,再配埋一桶5支Peroni啤酒,絕配!