電．競女掃場：Call刁彩虹　射破底價

2月份最後一個星期六，旺角信和、好景兩大Game場零舍旺場，事關多款遊戲大作趕及推出，聽店舖老友記尚算丁財兩旺，加上呢期行場播得最多嘅遊戲Trailer莫過於《機戰V》喇，所以呢個禮拜電．競女打算同大家跟貼一下Game碟市況啦。

《Call刁》《Rainbow Six》賣價射穿二百

射擊作品普遍銷路細水長流，唔理佢推出時間係一年半載，只要有共同戰友，Server又未Close嘅話，可以講幾時買番嚟玩都無問題。信和1樓角落某大Game店周不時拎啲舊作搞劈價，今個星期就有《Call Of Duty Infinite Warfare》和《Tom Clancy's Rainbow Six Siege》兩款現金價精選，前者二百找一，後者唔使百九，認真抵買呀！需知道最近《Rainbow Six Siege》就有免費改版「絲絨殼行動」，追加西班牙國家警察部隊特殊行動小組兩名全新特勤幹員，加上以西班牙當地知名度假勝地伊維薩島為主題的全新地圖，舊作都有新鮮感呀！

《Halo Wars 2》標準版到貨

Xbox陣營呢個月有啲弱，得隻即時戰略《Halo Wars 2》上市，其實上周搶閘開賣嘅係「旗艦版」，內含上集強化版《Halo Wars: Definitive Edition》下載碼，但係要焗賣超過五百，玩家未必就範，好多朋友都情願等本周2推出嘅淨新作「標準版」好過，事關約需四百即可無痛入手。其實聽官方講呢款遊戲有意變成電競項目，如果大家有心操練，早啲買番隻Train吓未嘗不可。

《機戰V》日限定版唔着數

香港機迷好多都係煲開日系Game，而今個禮拜最多人問就必定係首次移師至PS4嘅《機戰V》喇！星期四傍晚經已有好多朋友從Game店Facebook知道返貨消息，都飛撲買Game。聽老友記講大家都揀買中文版，因為可以了解劇情，同埋初回特典送埋曉擊霸和轟格殊兩款機體，至於價位一般五百左右，以過往經驗來說會降價機會不高。其實同場亦有賣日版的限定生產版本，追加登場機體共35首卡通SoundTrack於遊戲收聽，但就要賣近八百大元，仲要係歌曲並非Full Version而係遊戲內播放長度，咁買限定版就唔抵喇！

《尼爾：自動人形》4月等中文化

日系新作仲有Square Enix出品嘅動作冒險遊戲《尼爾：自動人形》，都係呢個星期低調發售。遊戲屬於2010年《尼爾》的外傳作品，憑藉奇幻畫風而被受關注，不過電．競女當年玩過就嫌佢畫面灰暗了無生氣，打得耐沉悶沒趣，所以到《尼爾：自動人形》上架亦不予厚望，兼且賣到近五百令人卻步。其實官方已宣布作品將於4月27日推出繁體中文版，售價唔使四百，似乎「遲買仲好享受」呢。

《三國志13 with威力加強版》威名更好玩

同樣標價五百有找，同樣有繁體中文介面，日本光榮出品《三國志13 with威力加強版》就明顯性價比高得多，加咗為強武將遊玩體驗，今次追加嘅「威名」系統大受粉絲歡迎，經大家口耳相傳後呢個星期銷情比上周還要好。電．競女亦見過有女仔趁男友生日偷偷地落Game舖買嚟畀個Surprise佢，實在太幸福呀！