電．競女掃場　Switch行情洗版

今日任天堂Switch行貨開賣，想必係全日Facebook洗版！所以今周電．競女當然要同大家報吓行情啦！不過殘酷嘅現實就係，今日所謂行貨「開賣」，其實貨量只夠之前預訂的玩家，所以想今日撲出街買機，惟有揀水貨喇！

日版Switch有價有市

落一轉旺角信和，幾間大舖都有提供水貨日版任記Switch，數量唔算好多，而沿途亦見有國內旅客衝入店問價甚至買機。當中全灰Joy-Con套裝平均都係三千二左右，但就硬食一隻《1-2-Switch》，如果要藍紅Joy-Con套裝就畀多一舊水，價格符合預期，未算炒得犀利。至於1樓Game舖套裝就賣貴一百，但就可以畀客揀《1-2-Switch》或者《Super Bomberman R》，不過貨量買少見少，各店價格隨供應會有所調整呢，大家撲貨要趁快！

《薩爾達》成風頭躉 限定版無貨

Switch行貨首發會有6款遊戲上市，包括《薩爾達傳說：荒野之息》、《1-2-Switch》、《Super Bomberman R》、《PuyoPuyo Tetris》、《魔界戰記5》、《信長之野望 創造with威力加強版》，價格由約三百五至六百不等。睇牌面後3隻都係舊Game移植，所以無乜人問津。最爆嘅當然係《薩爾達傳說：荒野之息》啦，新鮮出爐IGN、日本電玩通、Gamespot等知名Game網都畀40分滿分評價，話開放式世界玩法沉迷，難怪買機玩家都入呢隻，可惜包含公仔、Soundtrack等Bonus嘅限定版已無貨，粉絲要上網搵搵喇。

Hori配件成行成市

其實Switch未鋪貨，好多Game店已入定大批日本周邊副廠Hori的Switch專用配件，由遊戲卡收納盒、不同尺寸耐衝擊物料製Switch包裝套、主機和Joy-Con用保護貼都有得賣，價格由幾十蚊至二、三百不等。當中有2個配件值得留意，其中一款紅藍Joy-Con手掣套裝，可以跟藍紅版Switch套裝拼埋一齊，可組裝出全紅或全藍Joy-Con，不過要賣六百幾蚊，全灰手掣套裝都係佢一半價錢，認真唔抵；至於另一樣就係用來懸空Switch的支架，事關桌上模式下主機底部無法同時充電，故用咗呢個Stand就可以邊打機邊充電，賣價只係約百二，可以諗諗。